Apple 1 haftada 100 ga yaqin xodimini ishdan bo‘shatdi. Bunga nima sabab bo‘ldi?

Amerikaning Apple kompaniyasi o‘tgan haftada shartnoma bo‘yicha 100 ga yaqin xodimni ishdan bo‘shatdi. Bu haqda Bloomberg xabar berdi.

Kompaniyaga ko‘ra, qisqarishlar Apple biznesining joriy ehtiyojlaridagi o‘zgarishlari tufayli amalga oshirilgan. Shuningdek, pudratchilar kompaniyaga yangi xodimlarni yollash uchun mas’ul.

Bir oy oldin Apple 2023-yilda kompaniya xodimlarining kengayish sur’atlarini va ish haqi xarajatlarini kamaytirish niyatida ekanini xabar qilgandi.

Apple kompaniyasi uchun kadrlar tanlash bilan shug‘ullanuvchi pudratchilar kompaniyaning ko‘plab mintaqalardagi, jumladan, Texas va Singapur ofislaridagi xodimlarni qisqartirdi.

Apple ularga ikki haftalik ish haqini to‘lashga va tibbiy imtiyozlarini xuddi shu muddatga qadar saqlashga rozi bo‘ldi.

Boshqa ko‘plab kompaniyalar singari, Apple ham texnik yordam va mijozlarga xizmat ko‘rsatish kabi vazifalarni bajarish uchun shartnoma bo‘yicha xodimlarni ishga oladi.

Bundan tashqari, Apple kompaniyasi Kaliforniyadagi kompaniya bosh qarorgohi yaqinidagi Santa-Klara okrugida ishlovchi kompaniya xodimlariga 5-sentabrdan boshlab haftasiga kamida uch kun masofadan emas, balki ofislarda ishlashi kerakligi haqida xabar bergan.

Yangi siyosat kompaniyaning Kremniy vodiysidagi ofislarida kuchga kiradi va keyin boshqa mintaqalardagi ofislarga ham tarqaladi.

Avvalroq 30 yil davomida Apple’ning deyarli barcha dizaynlarini ishlab chiqqan odam kompaniyani tark etgani haqida xabar berilgandi.