Ijtimoiy tarmoqlarda Andijon mashinasozlik instituti talabasi institut binosida o‘z joniga qasd qilgani to‘g‘risida xabarlar tarqaldi. “Daryo” holatga aniqlik kiritish maqsadida Bosh prokuratura axborot xizmati bilan bog‘landi.
Hayot Shamsutdinov ma’lumotni tasdiqladi.
Ma’lum bo‘lishicha, Andijon mashinasozlik instituti Logistika yo‘nalishi 2-bosqich talabasi 5-avgust kuni talabalar yotoqxonasiga bir o‘zi kelib, tunab qolgan. Ertasiga, ya’ni 6-avgust kuni soat 09:30 larda yotoqxona hojatxonasi eshigiga kabel simidan sirtmoq yasab, o‘zini osib, joniga qasd qilgan. O‘lim sababini aniqlash yuzasidan sudga oid tibbiy hamda sud-biologik ekspertizasi tayinlangan.
Mazkur holat yuzasidan Andijon shahar prokuraturasi tomonidan tergovga qadar tekshiruv harakatlari olib borilmoqda.
“Daryo” manbalarining aytishicha, talaba asli Toshkent viloyatidan bo‘lib, u 5-avgust kuni o‘quv amaliyoti hisobotini topshirish maqsadida institutga kelgan. U boshqa talabalarga nisbatan a’lo baholarga o‘qishi, o‘zining xulqi va iqtidori bilan ajralib turgan. 2021-yildan buyon O‘zbekiston yoshlar ittifoqining fakultet yetakchisi sifatida institutning barcha tadbirlarida, jamoat ishlarida faollik ko‘rsatgan.
“To‘g‘risi bu bola haqida hamma yaxshi fikrda. Hech kim, hatto o‘qituvchilari bilan ham tortishmagan. Tartibli va berilgan vazifalarni o‘z vaqtida bajaradigan bola edi. Uning bunday nomaqbul ish qilganini eshitib, hayron qoldik”, — deydi “Daryo” muxbiri bilan suhbatlashgan manba.
Mavzuga doir:
Izoh (0)