Toshkentda muqaddam sudlangan erkak 107 paket gashish olib yurganda ushlandi
Toshkent shahri Chilonzor tumanida mashinasida gashish olib yurgan fuqaro qo‘lga tushdi. Bu haqda shahar ichki ishlar bosh boshqarmasi axborot xizmati “Daryo”ga ma’lum qildi.
Xabarga ko‘ra, 10-avgust kuni Chilonzor tumanida giyohvandlik vositalarini qonunga xilof ravishda saqlash holati bo‘yicha hamkorlikdagi maxsus tadbir o‘tkazilgan. Jumladan, Qatortol ko‘chasida muqaddam sudlangan 38 yoshli O.Sh. to‘xtatilgan.
Xolislar ishtirokida tekshirilganda yonidan keyinchalik sotish maqsadida saqlab kelinayotgan jami 107 dona paketga qadoqlangan, umumiy og‘irligi 150 gramm gashish giyohvandlik vositasi aniqlanib, ashyoviy dalil sifatida olingan. Shuningdek, unga tegishli bo‘lgan avtoustaxonadan yana 17 dona paketga qadoqlangan umumiy og‘irligi 10 gramm gashish giyohvandlik vositasi aniqlanib, ashyoviy dalil sifatida olingan.
Tekshiruv davomida ushbu giyohvandlik vositalari 36 yoshli S. tomonidan keyinchalik sotish uchun O.Sh.ga berilgani aniqlangan. Olib borilgan tezkor tadbir natijasida u ham huquqni muhofaza qilish organlari xodimlari tomonidan qo‘lga olingan.
Mazkur holat yuzasidan Chilonzor tumani IIO FMB tergov bo‘limi tomonidan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) bilan jinoyat ishi qo‘zg‘atilgan. Tergov davom etmoqda.
