O‘zbekistonda naqd pul ko‘payishi ketma-ket to‘rtinchi oy rekord darajaga yetdi

O‘zbekistonda muomaladagi naqd pul miqdori 42 trln so‘mdan oshdi. Bu haqda Markaziy bank hisobotidan ma’lum bo‘ldi.

Muomalaga chiqarilgan naqd pullar may oyida 3,7 trln so‘mga ko‘paygan bo‘lsa, iyun oyida bu ko‘rsatkich 3,6 trln so‘m bo‘lgan edi. 

Iyul oyida esa naqd pul miqdori ko‘payishi sekinlashdi va 1,9 trln so‘mga o‘sdi. Natijada 1-avgust holatiga ko‘ra, qariyb 42,4 trln so‘mga yetdi.

Shu tariqa muomaladagi naqd pul miqdori 2013-yildan beri ketma-ket to‘rtinchi oy rekord darajaga yetdi. Statistika aynan shu yildan boshlab keltirilgan.

May oyida keng ma’nodagi pul massasi rekord darajada ko‘payib, (+13,3 trln so‘m)  158,5 trln so‘m bo‘lgan edi. Iyunda esa bu ko‘rsatkich deyarli o‘zgarishsiz qoldi. Avgustda esa 159,1 trln so‘mga yetdi.

O‘tgan oyda milliy valyutadagi jami pul massasi 1,1 trln so‘mga oshib, 114,7 trln so‘mni tashkil etgan.

Chet el valyutasidagi depozitlar may oyida rekord darajada ko‘payib, 50 mlrd so‘mdan oshib ketgan edi. Iyun oyida esa 44,8 trln so‘mgacha kamaydi. 

Markaziy bank tomonidan joriy yilning 6 oyi mobaynida muomalaga qo‘shimcha 13,6 trln so‘m naqd pullar chiqarildi. 

Bundan tashqari, naqd pulga bo‘lgan talabni qondirish maqsadida, 15-iyuldan O‘zbekistonda 200 ming so‘mlik banknota muomalaga kiritildi. 

Avvalroq Markaziy bank O‘zbekistonda dollar kursi bilan bog‘liq vaziyatni tushuntirgani haqida xabar berilgan edi.