Қишлоқ хўжалиги вазирлиги ва Уммон Султонлигининг Аtyab International Services компанияси муассислигида Қўқон озиқ-овқат технологияси ва муҳандислиги халқаро институти ташкил этилади. Бу ҳақда президентнинг тегишли қарори лойиҳасида эълон қилинди.
Ҳужжатга кўра, ушбу халқаро институт Ўзбекистон қишлоқ хўжалигини ривожлантишнинг 2020—2030 йилларга мўлжалланган стратегиясида белгиланган вазифалар ижросини самарали ташкил этиш, қишлоқ хўжалиги ва озиқ-овқат маҳсулотларини қайта ишлаш, соҳада халқаро стандартлар асосида олий маълумотли юқори малакали мутахассислар тайёрлашни ташкил этиш ҳамда Ўзбекистоннинг олий таълим соҳасидаги халқаро ҳамкорлигини янада кенгайтириш мақсадида ташкил этилади.
Институт тўлиқ академик ва молиявий мустақил бўлган давлат олий таълим муассасаси ҳисобланади.
Ушбу олийгоҳда ўқитиш давлат таълим стандартларини ҳисобга олган ҳолда инглиз, рус ва ўзбек тилларида ўқитиш кундузги ва сиртқи шаклларда ҳамда масофавий таълим шаклида амалга оширилади. Унинг битирувчиларига Ўзбекистонда олий таълим тўғрисидаги ҳужжат сифатида тан олинадиган давлат намунасидаги диплом берилади.
Қабул қилиш параметрлари ва тартиби, битирувчиларнинг якуний аттестацияси тартиби ва шароитлари институт томонидан хорижий ҳамкор билан келишган ҳолда белгиланади.
Мавзуга доир: Венгриядаги нуфузли ОТМ Қўқондаги халқаро институт билан ҳамкорлик қилади
Изоҳ (0)