McDonald’s 11-avgust kuni Ukrainadagi restoranlarini kelgusi bir necha oy ichida qayta ochishni rejalashtirayotganini bildirdi. Bu haqda CNN xabar bermoqda.
McDonald’s qarori G‘arb kompaniyalari Rossiya bilan davom etayotgan mojaroga qaramay, mamlakatga qaytishga tayyor ekanligining birinchi belgisidir.
Dunyodagi eng yirik burgerlar tarmog‘i Ukrainadagi urush ortidan mart oyida Ukraina va Rossiyadagi barcha restoranlarini yopgandi.
McDonald’s’ning Ukrainada 109 ta restorani bor edi, biroq kompaniya ularning nechtasini qayta ochishni rejalashtirayotganiga aniqlik kiritmadi.
May oyida kompaniya Rossiyadagi 850 ta restoranining aksariyat qismini mahalliy litsenziya egalaridan biriga sotgan.
Bu qaror Ukraina rasmiylari, yetkazib beruvchilar va xavfsizlik bo‘yicha mutaxassislar bilan maslahat va muhokamalardan so‘ng, xodimlarimizning ishga qaytish so‘roviga javoban qabul qilindi, — dedi restoranning xalqaro operatsiyalar bozori rahbari Pol Pomroy.
McDonald’s Kiyev va Ukraina g‘arbida harbiy mojarolar xavfidan ko‘proq himoyalangan hududlarda restoranlarini qayta ochishni boshlaydi.
Avvalroq McDonald’s Rossiyani tark etganidan so‘ng 1,2 milliard dollar zarar ko‘rgani haqida xabar berilgandi.
Izoh (0)