McDonald’s 11 август куни Украинадаги ресторанларини келгуси бир неча ой ичида қайта очишни режалаштираётганини билдирди. Бу ҳақда CNN хабар бермоқда.
McDonald’s қарори Ғарб компаниялари Россия билан давом этаётган можарога қарамай, мамлакатга қайтишга тайёр эканлигининг биринчи белгисидир.
Дунёдаги энг йирик бургерлар тармоғи Украинадаги уруш ортидан март ойида Украина ва Россиядаги барча ресторанларини ёпганди.
McDonald’s’нинг Украинада 109 та ресторани бор эди, бироқ компания уларнинг нечтасини қайта очишни режалаштираётганига аниқлик киритмади.
Май ойида компания Россиядаги 850 та ресторанининг аксарият қисмини маҳаллий лицензия эгаларидан бирига сотган.
Бу қарор Украина расмийлари, етказиб берувчилар ва хавфсизлик бўйича мутахассислар билан маслаҳат ва муҳокамалардан сўнг, ходимларимизнинг ишга қайтиш сўровига жавобан қабул қилинди, — деди рестораннинг халқаро операциялар бозори раҳбари Пол Помрой.
McDonald’s Киев ва Украина ғарбида ҳарбий можаролар хавфидан кўпроқ ҳимояланган ҳудудларда ресторанларини қайта очишни бошлайди.
Аввалроқ McDonald’s Россияни тарк этганидан сўнг 1,2 миллиард доллар зарар кўргани ҳақида хабар берилганди.
Изоҳ (0)