AQSH qurol savdosi uchun Rossiyaga ham, Eronga ham “faol ravishda sanksiyalar kiritadi”, dedi AQSH Davlat departamenti rasmiy vakili o‘rinbosari Vedant Patel brifing chog‘ida.
“Eron tomonidan uchuvchisiz uchar qurilmalar qo‘llanilishi va tarqatilishi yuzasidan hamon juda tashvishdamiz. Ular AQSH kuchlariga, bizning mintaqadagi sheriklarimizga va xalqaro kemasozlik kompaniyalariga hujum qilish uchun foydalanildi”, — dedi Patel.
Davlat departamenti vakili o‘rinbosari aytishicha, undagi ma’lumotlarga ko‘ra, rossiyalik harbiylar “so‘nggi bir necha hafta davomida” Eronda uchuvchisiz uchar qurilmalar bilan ishlash bo‘yicha malaka oshirgan.
Eronning Rossiyaga bir necha yuzlab dronlar taqdim etish rejasi haqida AQSH prezidentining milliy xavfsizlik bo‘yicha yordamchisi Jeyk Sallivan iyul o‘rtalaridayoq xabar bergandi. Vashington ma’lumotlariga ko‘ra, Moskva Tehrondan Ukrainadagi harbiy operatsiyada foydalanish uchun qurol tashishga qodir uchuvchisiz uchar qurilmalarni so‘ragan. Bundan tashqari, Sallivan iyuldayoq Eron nafaqat dronlarni yetkazib berishga, balki Rossiya qo‘shinlariga ulardan foydalanishni o‘rgatishga ham tayyorlanayotganini aytgandi.
Bunga javoban, Rossiya prezidenti yordamchisi Yuriy Ushakov Vladimir Putin 19-iyul kungi Tehronga ishchi safari chog‘ida Eron oliy yetakchisi Ali Xomeyniy bilan uchuvchisiz qurilmalar yetkazib berish masalasini muhokama qilmaganini aytdi. Ushakovning so‘zlariga ko‘ra, ikkala davlat rahbarlari “konseptual masalalarni — dunyodagi vaziyatni va ikki tomonlama aloqalarni” muhokama qilgan.
Izoh (0)