Бухоро шаҳрида «Қорадори—2022» тезкор профилактик тадбири ўтказилиб, унда марихуана сотаётган 19 ёшли фуқаро ушланди, деб хабар бермоқда вилоят ички ишлар бошқармаси ахборот хизмати.
Маълум қилинишича, 8 август куни сат 21:30 да Бухоро шаҳри ИИО ФМБ жиноят қидирув ходимлари томонидан тезкор тадбир ўтказилган. Жараён давомида Бухоро тумани «Шехонча» маҳалласида яшовчи, 2002 йилда туғилган М.М. бошқа бир фуқарога марихуана сотаётганда ушланган.
У Бухоро шаҳри «Арк» қўрғони қаршисидаги боғ ичида бир дона оқ қоғоз бўлагига ўралган, вилоят ички ишлар бошқармаси эксперт криминалистика бўлимининг судга оид кимёвий экспертиза хулосасига кўра соф вазни 10,59 граммга тенг бўлган кўп миқдордаги марихуана гиёҳвандлик воситасини 3 миллион 200 минг сўмга пуллаётганда қўлга олинган.
Ҳолат юзасидан шаҳар ИИО ФМБ тергов бўлими томонидан М.М.га нисбатан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)