АҚШ қурол савдоси учун Россияга ҳам, Эронга ҳам «фаол равишда санкциялар киритади», деди АҚШ Давлат департаменти расмий вакили ўринбосари Ведант Патель брифинг чоғида.
«Эрон томонидан учувчисиз учар қурилмалар қўлланилиши ва тарқатилиши юзасидан ҳамон жуда ташвишдамиз. Улар АҚШ кучларига, бизнинг минтақадаги шерикларимизга ва халқаро кемасозлик компанияларига ҳужум қилиш учун фойдаланилди», — деди Патель.
Давлат департаменти вакили ўринбосари айтишича, ундаги маълумотларга кўра, россиялик ҳарбийлар «сўнгги бир неча ҳафта давомида» Эронда учувчисиз учар қурилмалар билан ишлаш бўйича малака оширган.
Эроннинг Россияга бир неча юзлаб дронлар тақдим этиш режаси ҳақида АҚШ президентининг миллий хавфсизлик бўйича ёрдамчиси Жейк Салливан июль ўрталаридаёқ хабар берганди. Вашингтон маълумотларига кўра, Москва Теҳрондан Украинадаги ҳарбий операцияда фойдаланиш учун қурол ташишга қодир учувчисиз учар қурилмаларни сўраган. Бундан ташқари, Салливан июлдаёқ Эрон нафақат дронларни етказиб беришга, балки Россия қўшинларига улардан фойдаланишни ўргатишга ҳам тайёрланаётганини айтганди.
Бунга жавобан, Россия президенти ёрдамчиси Юрий Ушаков Владимир Путин 19 июль кунги Теҳронга ишчи сафари чоғида Эрон олий етакчиси Али Хомейний билан учувчисиз қурилмалар етказиб бериш масаласини муҳокама қилмаганини айтди. Ушаковнинг сўзларига кўра, иккала давлат раҳбарлари «концептуал масалаларни — дунёдаги вазиятни ва икки томонлама алоқаларни» муҳокама қилган.
Изоҳ (0)