Трамп ўз-ўзига қарши гувоҳлик беришдан бош тортди

АҚШ собиқ президенти Дональд Трамп, Мар-а-Лагодаги қароргоҳида ўтказилган тинтувлардан кейин, гувоҳлик беришдан бош тортди, деб ёзади «РБК» The New York Times’га таяниб.

У фуқароларга ўз-ўзига қарши гувоҳлик бермаслик ҳуқуқини берувчи АҚШ Конституциясига киритилган бешинчи тузатишни пеш қилди.

Трамп Нью-Йорк бош прокурори Летиция Жеймснинг саволларига жавоб берар экан, бир неча соат давомида битта жавобни таъкидлаб турган.

Шу билан бирга, собиқ давлат раҳбари бош прокурорни мамлакат «тарихидаги энг катта жодугарлар ови»ни уюштиришда айблаган.

«Бир куни мен шундай савол бергандим: ‘Агар айбсиз бўлсангиз, унда нега Бешинчи тузатишдан фойдаланяпсиз?’. Бунинг жавобини энди билдим», — деди Америка собиқ етакчиси. Унинг сўзларига кўра, ҳукумат ва ОАВлар томонидан таъқибга учрагани унга жим туришдан бошқа «мутлақо ҳеч қандай танлов» қолдирмаган.

ФҚБ агентлари 8 август, душанба куни Трампнинг Флоридадаги Мар-а-Лаго қароргоҳида тинтув ўтказган эди. The New York Times вазиятдан хабардор манбаларига таяниб ёзишича, ФҚБ Трампнинг уйини у Оқ уйни тарк этганидан кейин ўзи билан олиб кетган ҳужжатлар туфайли тинтув қилмоқда. Ҳужжатларда махфий маълумотлар бўлиши мумкин.

Нашрга кўра, АҚШ миллий архиви «кўп ойлар давомида» 15 қути ҳужжатларни қайтаришни сўраган ва ушбу ҳужжатлар йўқ қилиниши эҳтимоли юзасидан ФҚБга мурожаат қилган. «Жаноб Трамп ўз президентлиги даврида ҳукумат архивларида сақланиши керак бўлган расмий қоғозларни йўқ қилиб ташлагани билан танилган», — деб ёзади газета.

Кейинроқ ҳужжатлар қайтарилган.

Трампнинг сўзларига кўра, агентлар тинтув чоғида ҳатто унинг сейфини ҳам бузиб очган. Собиқ президент ФҚБ хатти-ҳаракатларини сиёсий тусга эга деб атади. Унинг ишонч билдиришича, амалдаги президент Жо Байден ФҚБнинг тинтув ўтказиш ниятидан хабардор бўлган. Агар иш расман айблов эълон қилишгача бориб етса, Трамп 2024 йилги президентлик сайловига ўз номзодини қўйиш имкониятидан маҳрум бўлиши мумкин.

Трампга нисбатан яна бир иш 2021 йил 6 январда Капитолийда юз берган тартибсизликлар билан боғлиқ.

АҚШда аввалги президентлик сайловлари 2020 йилнинг ноябрь ойида бўлиб ўтган. Сайлов натижаларига кўра, Трамп 232 та, унинг рақиби Жо Байден 306 та овоз тўплаган. Байден овоз бериш адолатли ўтганини таъкидлайди.

2021 йилнинг январь ойи бошида Вакиллар палатаси сайлов натижаларини маъқуллайдиган куни Трамп тарафдорлари Вашингтонда митингга йиғилди. Намойишчилар Капитолийни эгаллаб олди, уларга қарши кўзни ёшлатувчи газ ва шовқинли гранаталардан фойдаланилди. Тўқнашувларда беш киши ҳалок бўлган. Байден Трампни зўравонликка ундаганликда айблади.