Rossiyaliklarga Shengen vizalari berilishini taqiqlash haqidagi taklif Yevroittifoqda muhokamaga qo‘yildi, bu haqda Germaniya hukumati rasmiy vakili Shteffen Xebeshrayt ma’lum qildi, deb yozadi Meduza.
“Loyiha Yevroittifoqning ba’zi mamlakatlari tomonidan kiritildi va shu tariqa kun tartibida turibdi”, — dedi Xebershtrayt. Uning qayd etishicha, Germaniya hukumati taklifni e’tiborga olgan va hozir u bo‘yicha munozaralar bo‘lib o‘tmoqda.
Shuningdek, Germaniya TIV aniqlik kiritishicha, taklif nafaqat sayyohlarga, balki jurnalistlar, dissidentlar va Yevroittifoq mamlakatlari fuqarolarining qarindoshlariga ham viza berishni taqiqlashni o‘z ichiga oladi. U yerda ma’lum qilinishicha, taklif avgust oxirida Pragada Yevroittifoq mamlakatlari tashqi ishlar vazirlari uchrashuvida muhokama qilinadi.
Germaniya TIV vakili bunday taqiq haqidagi munozaralarni “farazlarga asoslangan” deb atadi.
Rossiyaliklar uchun Shengen vizalarini taqiqlash zarurligi to‘g‘risidagi munozaralar iyulda faollashdi, o‘shanda Rossiya hukumati quruqlikdagi chegaralarni ochgan va rossiyaliklar yoppasiga Latviya, Estoniya va Finlyandiya orqali tranzit bilan G‘arbiy Yevropaga jo‘nab keta boshlagan edi.
Yevroittifoqning ba’zi mamlakatlari vizalar berishni bahordayoq, urush boshlanganidan keyin deyarli darhol to‘xtatgan edi. Ular orasida barcha Boltiq davlatlari, Chexiya, Slovakiya, Malta bor. Polsha Rossiya fuqarolariga bevosita Rossiyadan yoki Belarusdan mamlakatga kirib kelishni taqiqladi.
Avvalroq Yevrokomissiya Shengen kelishuvi qoidalari rossiyaliklarga viza berishni to‘liq taqiqlash imkoniyatini ko‘zda tutmasligini ma’lum qilgandi.
Ukraina prezidenti Vladimir Zelenskiy G‘arb mamlakatlari barcha rossiyaliklarga o‘z hududiga kirishni taqiqlashi kerakligini aytgandi. Uning so‘zlariga ko‘ra, shu paytgacha Rossiyaga qarshi kiritilgan sanksiyalarning barchasi Rossiya fuqarolari uchun bir yilga chegaralarni yopish va Rossiya yonilg‘isini sotib olishga to‘liq embargo qo‘yish oldida “kuchsiz” hisoblanadi.
Izoh (0)