Ҳибсда сақланаётган пайтда Тбилисининг «Вивамед» клиникасига ётқизилган Грузия собиқ президенти Михаил Саакашвили жиддий касалликка чалинган. Бу ҳақда невролог Отар Тоидзе сиёсатчини кўриб келганидан кейин маълум қилди, деб ёзади Tengrinews.
Тоидзенинг сўзларига кўра, яқин кунларда Саакашвилини бир гуруҳ шифокорлар бориб кўриб, собиқ давлат раҳбарининг саломатлиги ҳақида якуний ҳисобот тузади.
«Қарийб бир ойдан бери Саакашвилини кўрганимиз йўқ. Ҳозирги аҳволи ҳақида фақат ОАВлар ва шифокорлар билан қисқа суҳбат орқали хабардормиз. Михаил Саакашвилининг ҳузурига биринчи ҳамда сўнгги ташрифларим ўртасида катта фарқ бор. У гапиришида қийинчиликлари бўлмаган одам эди, юришида ҳам ҳозиргидек даражада муаммолар йўқ эди. Шунинг учун яқин кунларда холис баҳо бериладиган якуний хулосани ёзиш учун унинг олдига борамиз. Бу учинчи даражали оғирликдаги касалликдир, бу охиргисидан иккинчи даража, яъни ўлимга яқин босқич», — деди невролог.
10 август куни Саакашвилини бориб кўрган митрополит Николоз айтиб беришича, сиёсатчи жуда озиб кетган, клиникада ўтказган вақти мобайнида 11 кг вазн йўқотган.
Грузиянинг учинчи президенти айни пайтда Тбилисидаги «Вивамед» клиникасида бўлиб турибди, у ерга Рустави қамоқхонасида икки марта очлик эълон қилганидан кейин 12 май куни ўтказилган эди. Грузия Жиноий-ижроия хизмати маълум қилишича, собиқ президентнинг аҳволи барқарор бўлиб турибди ва у тиббий ходимлар назорати оститадир.
Саакашвилининг ўғли Эдуард отаси ўзини Грузия сиёсатида бошқа кўрмаётганини ва ўзининг бор эътиборини Украинадаги вазиятга қаратганини айтди.
Мавзуга доир:
- Грузия бош вазири Саакашвилини Россияга қарши иккинчи фронтни очишга уринганликда айблади
- Михаил Саакашвили яна муддатсиз очлик эълон қилди. Аввалги очлик 51 кун давом этганди
- Саакашвили агар хорижлик шифокорлар унинг олдига қўйилмаса, яна очлик эълон қилмоқчи
- «Овқат ҳам еёлмаяпти». Адвокат Саакашвилининг аҳволи ҳақида маълум қилди
Изоҳ (0)