Қозоғистон Саноат ва инфратузилма вазирлиги, гўёки, Украинага етказиб берилиши учун Буюк Британияга қурол сотгани ҳақидаги маълумотни рад этди, деб ёзади «Интерфакс».
«2021 йилда ва 2022 йилнинг ўтган даврида ‘Техноэкспорт’ қурол-яроғ, ўқ-дорилар ва ҳарбий техника экспортига лицензия олиш учун вазирликка мурожаат қилмаган. Бундан ташқари, кўрсатилган даврда вазирлик томонидан Буюк Британияга қурол-яроғ, ўқ-дори ва ҳарбий техника, айнан эса 122 мм (Д-20 гаубицалари учун) снарядлар, 152 мм (Д-30 гаубицалари учун), «Град» БМ-21 учун ракеталар, БТР-4 (БТР-82А ёки соддалаштирилган модификациялар) ва 120 мм ўқ-дорилар (миномётлар ва «Конкурс» танкка қарши бошқарилувчи ракета учун) экспорт қилиш учун лицензия тақдим этилмаган», — дея маълум қилди Саноат вазирлиги 10 август куни.
Идорада қайд этишларича, қурол-яроғ ва ўқ-дорилар экспорти импорт қилувчи мамлакатда у ушбу қурол-яроғ ва ўқ-дориларни Қозоғистоннинг экспорт назорати соҳасидаги ваколатли органи рухсатисиз қайта экспорт қилмаслиги ҳақидаги мажбурий қоидани кўзда тутувчи кафолатли мажбурияти мавжуд бўлган тақдирдагина амалга оширилади.
«Вазирлик томонидан юқорида тилга олинган қурол-яроғ ва ўқ-дориларни қайта экспорт қилиш учун рухсатнома тақдим этилмаган», — дея қўшиб қўйди вазирлик.
Нашр эслатишича, аввалроқ айрим Telegram-каналларда Буюк Британия кейинчалик Украина ҳудудига етказиб бериш учун Қозоғистондан қурол сотиб олаётгани ҳақида хабарлар тарқалган эди. Олди-сотди, гўёки, «Техноэкспорт» компанияси воситачилигида амалга оширилмоқда, 46 миллион долларлик шартнома эса 2022 йил 16 июлда тузилган.
Изоҳ (0)