АҚШ Давлат департаменти Украинадаги Запорожье атом электр станцияси атрофида қуролсизлантирилган ҳудуд яратиш ташаббусини маъқуллайди, деб хабар беради Meduza.
Биз Россияни Украина ядровий иншоотлари ва яқинидаги барча жанговар ҳаракатларни тўхтатишга ва улар устидан тўлиқ назоратни Украинага қайтаришга чақиришда давом этамиз. Шунингдек, Украинанинг атом электр станцияси атрофида қуролсизлантирилган ҳудуд яратиш ҳақидаги чақириқларини қўллаб-қувватлаймиз, — дейилади баёнотда.Шунингдек, Антониу Гутерриш идораси БМТ Запорожье АЭСига ўз тинчликпарвар кучларини жойлаштириш ниятида эмаслигини маълум қилди. БМТ бош котибига кўра, томонларнинг ўзлари хавфсизликни таъминлашга қодир.
Эслатиб ўтамиз, Россия Запорожье атом электр станциясининг ўққа тутилиши туфайли 11 август куни БМТ Хавфсизлик кенгаши мажлисини ўтказишни талаб қилди. Шунингдек, Россия МАGATE бош директори Рафаэл Гросси маърузачи сифатида қатнашишини сўраган.
Айни пайтда АҚШ Россияни Запорожье АЭС устидан назоратни Украинага беришга чақирмоқда.
«Биз Россияни Украина ядро объектларида ёки уларнинг яқинида барча ҳарбий операцияларни тўхтатишга, шунингдек, ушбу объектлар устидан тўлиқ назоратни Украинага қайтаришга чақиришда давом этамиз», — деди Оқ уй матбуот котиби Карин Жан-Пьер брифинг чоғида.
Аввалроқ Россия ҳукумати Халқаро атом энергияси агентлиги (МАGATE) раҳбариятига делегациянинг АЭСга ташрифини ташкиллаштиришда ёрдам беришга тайёрлигини билдирган эди. БМТ бош котиби Антониу Гутерриш МАGATE инспекторларига электр станциясига кириш имкониятини беришга чақирган ва унга берилган зарбаларни «ўз жонига қасд қилиш» деб атаган эди. Айни вақтда Россия ТИВ БМТ котибиятини ташрифга тўсқинлик қилишда айбламоқда (МАGATE БМТ раҳбарлиги остида ишлайди). Россия томони Запорожье АЭСнинг Украина томонидан давомли ўққа тутилиши глобал техноген ҳалокатга олиб келиши мумкинлиги, станция хавф остида тургани ҳақида огоҳлантирди.
Изоҳ (0)