Xonanda Aziz Rajabiy MY5 telekanalining “Omon-omon” ko‘rsatuviga bergan intervyusida nechta farzandi borligi, tog‘asining qiziga uylangani, piarga munosabati, Java’ning “Dunyo sening tog‘angmas” taronasiga fikri va u bilan duet kuylash taklifi haqida gapirdi.
Aziz Rajabiy nechta farzandi borligi va yettita farzandi bo‘lishini istagani haqida
“Hozir to‘rt nafar farzandim bor, to‘ng‘ich farzandim AQSHga ketgan, o‘sha yerda o‘qiydi. Men yettita farzandim bo‘lishini istaganman. Ayolning fiziologik holatiga qarash kerak ekan”, — deydi xonanda.
O‘ziga tog‘asining qizini munosib ko‘rgan xonanda
“Tog‘amning qiziga uylanganman. Unga munosib nomzod qidirib yurardim, bir qancha do‘stlarimni nomzod sifatida o‘ylab yurganman. Kim unga mos kelarkan deganman, o‘zimga nasib qilgan ekan”, — deydi Aziz Rajabiy.
Xonanda piarga qanday munosabatda?
“Piar yolg‘ondan uyushtirilgan narsa. Umuman olib qaraganda, bu ham bir yo‘nalish. Menda piar qilish holati bo‘lmagan. Biroq shuning ortidan yurib nima qilsam ekan, deb o‘ylab yuradiganlar bor. Masalan, Rossiyada va Yevropada shu orqali tanilishadi, piar-menejerlar bo‘ladi. Shuni o‘ylab ssenariy tuzadi, aniq bu natijaga olib chiqamiz deydi. Ijtimoiy tarmoqlarda, hamma yerda ovoza qiladi”, — deydi xonanda.
Java’ning “Dunyo sening tog‘angmas” taronasiga munosabati
“Menga Java’ning musiqasi yoqdi, so‘zida ma’no bor. Mayli, yuzini o‘ragandir. So‘zlari haqiqatan ham to‘g‘ri. U o‘zining ichidagini boshqacha uslubda kuyladi, ma’nosini chaqsangiz, gaplari to‘g‘ri. Uning o‘rangani ham balki piardir, bilmadim. Bu ish qanchalik to‘g‘ri ekanini bilmayman, men esa bu ishni qilmas edim. Uni hamma ko‘rdi, agar shunaqa qilmaganda, balki uncha yodda ham qolmas edi. Agar mening o‘g‘lim shu ishni qilsa, o‘g‘lim nima qilyapsan, yech matoni, nimaga o‘rab olding, derdim. Birinchi ko‘rganimda bilganman, o‘ziga jalb qilish uchun shu ishni qilgan. Qayerdadir musiqasini eshitdim, keyin bildim”, — deydi Aziz Rajabiy.
Aziz Rajabiy Java bilan duet kuylaydimi?
“Uning yo‘nalishi boshqa, agar xuddi shunaqa chiqaman desa, duet kuylamayman. U qachongacha bu obrazda yuradi? To‘yga ham shunaqa holatda boribdi. Bunday narsalar ko‘pga bormaydi”, — deydi xonanda.
Izoh (0)