“O‘zimdan o‘zimgacha”, “Baron”, “Novda” fimlaridagi roli orqali tanilgan aktrisa Shahzoda Matchonova 8-avgust kuni 35 yoshni qarshi oldi. Shu munosabat bilan “Daryo” nashri aktrisaning hayot va ijod yo‘li haqida ma’lumot beradi.
San’atkor oilasida voyaga yetgan, hech qachon aktrisa bo‘lishni orzu qilmagan yulduz
Mahoratli aktrisa Shahzoda Matchonova 1987-yilning 8-avgust sanasida Qoraqalpog‘istonnning Nukus shahrida tug‘ilgan. U oilada uch nafar farzandning o‘rtanchasi bo‘lgan, ya’ni uning akasi va ukasi bor. Aktrisa san’atkorlar oilasida voyaga yetgan, uning bobosi O‘zbekiston, Qoraqalpog‘iston va Boshqirdiston xalq artisti Bayram Matchonov hisoblanadi. Bo‘lajak aktrisa o‘rta maktabni tugatganidan so‘ng Toshkentdagi Jahon iqtisodiyoti va Diplomatiya universitetiga o‘qishga kirgan. U aktrisa bo‘lish haqida umuman o‘ylamagan.
Kastingdan boshlangan muvaffaqqiyat yo‘li
Oradan vaqt o‘tib Shahzoda Matchonova “O‘zbekfilm” direktori nazariga tushadi va shundan keyin u aktirsaga bir filmda suratga tushish uchun sinovdan o‘tishi haqida gapiradi. Aktrisa bunga rozi bo‘ladi va borib sinovdan o‘tishga harakat qiladi, biroq undan o‘ta olmagan aktrisa universitetdagi o‘qishini dvom ettiradi. Ko‘p o‘tmay mashhur rejissor Zebo Navro‘zova uning suratlarining ko‘rib kastingga taklif qiladi. Shundan so‘ng u kastingdan o‘tadi va 2007-yilda mashhhur xonanda Shohruxxon ishtirokidagi “Aprel-may” filmida ilk rolini ijro etadi.
Ijod dengiziga g‘arq bo‘lgan aktrisa
Ilk filmdagi rolidan keyin tomoshabinlarning e’tiboriga tushgan aktrisaga ko‘plab rejissorlar tomonidan taklif berila boshlaydi. Shundan keyin bir qator filmlarda suratga tushadi.
Shahzoda 2009-yilda Farruh Soipov hamda Timur Primqulov rejissorligida suratga olingan “Qalbim o‘g‘risi” filmida bosh rolni ijro etgan. Uning qahramoni badavlat oila farzandi bo‘lib, uyiga o‘g‘rilikka tushgan yigit (Farruh Soipov)ga ko‘ngil qo‘yadi.
Bundan tashqari aktrisa ishtirokidagi “Osiy banda”, “To‘qlikka sho‘xlik”, “Baron”, “Novda” filmlari muxlislarning qalbidan joy olgan.
Shahzoda Matchonova san’at olamidagi faoliyati davomida ko‘plab xonandalarning klipida suratga tushgan. Botir Qodirovning “Yurak”, Sanjar Holiqovning “Lolalar”, Jasur Mavlonovning “Dunyo ekan”, “Ummon” guruhining “Sen meniki emassan” kliplari shunga misoldir.
“Markaziy Osiyoning eng yaxshi aktrisasi”ga aylangan Shahzoda Matchonova
Aktrisa Shahzoda Matchonova Qirg‘izistonda “Markaziy Osiyoning eng yaxshi aktrisasi” yo‘nalishida “Ak Ilbirs—2018” milliy mukofotini qo‘lga kiritgan. Mazkur mukofot 2012-yilda ta’sis etilgan bo‘lib, 2017-yildan boshlab Markaziy Osiyodagi eng yaxshi aktyor va aktrisalar ham taqdirlanishni boshladi.
Muxlislarini kitob o‘qishga chorlovchi aktrisa
Shahzoda Matchonova Instagram’dagi sahifasi orqali muntazam ravishda folloverlariga o‘qigan kitoblari haqida ma’lumot berib keladi. U muxlislariga Viktor Gyugoning “Kulayotgan odam”, Antuan de Sent-Ekzyuperining “Kichkina Shahzoda”, Pirimqul Qodirovning “Yulduzli tunlar”, Tohir Malikning “Iblis devori” asarlarini o‘qishni maslahat bergan.
Ijtimoiy tarmoqlarda faol aktrisa
Aktrisa Shahzoda Matchonova ijtimoiy tarmoqlarda ancha faol. Uning Instagram sahifasida ikki yarim milliondan ortiq obunachi bor. Shahzoda Matchonova sahifasiga o‘zining turli xil suratlarini va gohida muxlislarini kayfiyatini ko‘taruvchi post ham joylab turadi. Masalan, aktrisa Gollivud yulduzi Leonardo Di Kaprioning muxlisi ekanini, u uylanayotgan paytda sahifasiga bu holatdan kayfiyati yo‘qligini hazil tariqasida ma’lum qilgan.
“Kayfiyatim yo‘q. Aytishlaricha, Leo Di Kaprio uylanayotgan ekan. Mayli, nima ham qilardim. Baxtli bo‘lsin!”, — deb yozadi Shahzoda.
Pufaklar bilan xayolan parvoz
Shahzoda Matchonova Instagram'dagi sahifasida pufaklarni yaxshi ko‘rishi haqida bir necha bor ta’kidlagan. Aktrisa muxlislariga koronavirus karantiniga qadar unga sovg‘a qilingan 8 mingta pufak bilan tushgan suratlarini ko‘rsatgan.
Aktrisaning Instagram sahifasida uning minglab pufaklar bilan tushgan rasmlarini ko‘rish mumkin.
Ko‘plab tillarni biluvchi poliglot aktrisa
Kitobxon aktrisa sifatida ko‘pchilikka tanish Shahzoda Matchonova rus, ingliz va turk tillarini biladi. Qayd etish kerakki, u Instagram sahifasidagi postlarining aksariyatini rus tilida yozadi.
Shahzoda Matchonova nima sababdan shaxsiy hayotini sir tutadi?
“Shaxsiy hayot shaxsiy masala hisoblanadi. San’atkor inson shaxsiy hayotini sir saqlashga haqqi bor. Men ham shunday fikrdaman. Saxsiy hayotimni odamlarga ko‘rsatishni noto‘g‘ri deb bilaman, chunki har xil odam bor. Kimdir ko‘ra olmaydi, kimdir yomon ko‘z bilan qarashi mumkin. Men bularga juda e’tibor beraman. Shuning uchun ham shaxsiy hayotimni, oilamni, turmush o‘rtogimni, ota-onamni hech qachon ijtimoiyy tarmoqlarga namoyish qilmayman. Oilani ‘yopiq mavzu’ deb bilaman”, — deydi aktrisa.
Aktrisa nima sababdan ko‘p hollarda qora rangdagi liboslar kiyadi?
“Stilistlar bu rangni maslahat bermaydi va men ulardan maslahat olmayman. Menga nima yoqsa va yarashsa shuni kiyaveraman. Qora kiyimlarni juda yaxshi ko‘raman. Menimcha, qora kiyimlar ayol kishiga boshqacha hissiyot beradi. Biroq qora kiyimlardan ko‘proq oq kiyimlarni kiyaman deb o‘ylayman”, — deydi Shahzoda Matchonova.
Shahzoda Matchonovaning san’at olamidagi sanoqli yaqinlari bormi?
“Odamlar bilan gaplashishni juda yoqtiraman, muxlislarim bilan ham ko‘p gaplashib turaman. Ijtimoiy tarmoqlar orqali juda yaxshi narsalarni o‘rganish mumkin. Masalan, men ko‘pincha Instagram, Facebook'dan foydalanaman. Har xil psixologik mavzulardagi videolarni ko‘raman.
Hayotda yaxshi insonlar juda ko‘p. Sevgi, do‘stlikka ishonaman. San’at olamida ham yaqinlarim bor, chunki bizning ishda ichki dunyoqarashlarimiz bir xil. Biroq ishdagi ham, ko‘chadagi ham, sohamizdagi insonlarning hammasini hurmat qilaman”, — deydi aktisa.
Aktrisa qanday insonlardan qo‘rqadi?
“Va’dasida turmaydigan erkaklarni hurmat qilmayman, chunki men uchun erkak kishini juda mard, so‘zida turadigan, bir gap aytsa bajaradigan bo‘lishi kerak deb bilaman. Shuning uchun va’dasida turmaydigan erkaklar men uchun juda qo‘rqinchli”, — deydi Shahzoda Matchonova.
Shahzoda Matchonova qaysi partnyori bilan oson ishlay olishi haqida
“Har bir partnyorim bilan til topishib, oson rol o‘ynayman. Odamlar bilan til topishish men uchun juda oson kechadi. Qanday inson bo‘lishidan qat’i nazar men insonlarni yaxshi ko‘raman. Shuning uchun ijodimda hech qaysi partnyorim bilan qiyinchilik bo‘lmagan”, — deydi aktrisa.
Aktrisa qanday rollarni sog‘ingan?
“Unday rollar yo‘q. Hozircha unaqa tushuncha yo‘q. Lekin juda ham suratga olish jarayonlarida ishtirok etishni sog‘indim. Bari bir aktyorlar qancha vaqt o‘tsa ham bu jarayonni sog‘inarkan. Bir xil rol o‘ynashni yoqtirmayman”, — deydi Shahzoda Matchonova.
Ikkinchi turmushdan topilgan baxt
Shahzoda Matchonova ilk marta 2016-yilda turmush qurgan, biroq aktrisa oradan ko‘p vaqt o‘tmay ajrashganini ma’lum qilgan. Aktrisa Instagram’dagi sahifasida mehribonlik uyidan bola asrab olish niyati borligi haqida ham gapirgan. Ikkinchi turmushidan baxtini topgan aktrisani hozirda qizi Raniyani tarbiya qilmoqda. Shahzoda Matchonova turmush o‘rtog‘i unga hech qachon qo‘l ko‘tarmasligini ta’kidlagan.
Mavzuga doir:
- Shahzoda Matchonova ajrashgani hamda bola asrab olish istagi haqida so‘zlab berdi
- Shahzoda Matchonova ilk marta ona bo‘ldi
- Shahzoda Matchonova o‘qishni tavsiya etadigan 10 ta kitob
- Aktrisa Shahzoda Matchonovaga 8 mingta pufak sovg‘a qilishdi (foto)
- Shahzoda Matchonova: Kayfiyatim yo‘q, sevgilim uylanayotgan ekan
Izoh (0)