Kinofilm, video, ko‘rsatuvlar jarayonlari va yoki turli xil tryuklarni bajarish har doim ham ko‘ngildagidek natija bermaydi. Bu jarayon davomida turli xil jarohatlarni olish ham mumkin. O‘zbek shou-biznes olamida kasbiy faoliyati sabab turli xil jarohat olgan mashhurlar aynan shunga misol bo‘la oladi. “Daryo” nashri kasbiy faoliyati davomida turli xil jarohatlarni olgan mashhurlar haqida ma’lumot beradi.
Bahora Arslonova
Aktrisa Bahora Arslonova “Mardikor ayol” serialining suratga olish jarayonida yiqilib boshidan jarohat olgan. U serialda yiqilib tushishi kerak bo‘lgan sahnada ishtirok etgan. Suratga olish jarayonidan keyin aktrisa haqiqatan ham yiqilganida yomon ahvolga kelganini aytgan.
Botir Imomxo‘jayev
Aktyor, teleboshlovchi Botir Imomxo‘jayev klipga suratga tushayotgan vaqtda to‘satdan oyog‘i sirpanib yuztuban yiqilgan va jarohat olgan. Ikrom Ali boshchiligida suratga olinayotgan klipda u aktrisani quvlagan va shundan keyin bu holat yuz bergan. Aktyor suratga olish jarayonlaridan so‘ng sog‘lig‘i haqida hech qanday ma’lumot bermadi.
Yigitali Mamajonov
Aktyor Yigitali Mamajonov “Esimda yo‘q” filmining suratga olish jarayonida tryuk bajarayotgan vaqtda yiqilib tushgan. U faoliyati davomida bundan ham yomon jarohat olishi mumkin bo‘lgan tryuklarni bajarganini aytgan.
Bundan tashqari u yana bir suratga olish jarayonida jarohatlanganini ma’lum qilgan edi. “Suratga olish ishlari oson emas. Anchadan beri jarohat olmagan edim, bo‘lib turadi”, — deydi aktyor.
Sitora Farmonova
Aktrisa Sitora Farmonova “Baykonur” filmida yiqilib tushib og‘ir jarohat olgan. Bu haqda uning onasi Zamira Farmonova “Sevimli” telekanalining “Mashhurlar” ko‘rsatuviga bergan intervyusida aytib o‘tgan.
“Qizim Setora nemis rejissori suratga olayotgan “Baykonur” filmida suratga tushgan. Juda yaxshi rol o‘ynagan. Kinoning suratga olish jarayonida atrofiga marmar terilgan suzish havzasiga nimadir bo‘lib yiqilib tushgan. Shundan keyin uning bo‘yni yirtilib ochilib qolgan. Shifokorga olib borishgan, tikamiz deyishgan.
Rejissor esa tikish mumkin emas, bu qiz bizda rol o‘ynayapti, har bir kunimiz belgilangan uning jarohati qachon bitadi deb kuta olmaymiz degan. Tikishga ruxsat bermagandan keyin qizim mototsilkni ijaraga olib shifokorga o‘zi borib davolangan.
Rol o‘ynab bo‘lgandan keyin uyga keldi, shunda qarasam bo‘ynida bint bor. Bo‘yningga nima qildi desam, hech narsa dedi. Ko‘rsatmaguncha qo‘ymadim, keyin qarasam 3-4 sm joy yirtilib ochilib qolgan. Shunda shifokorlar shukr qiling, bu jarohat bilan tirik qolish kamdan-kam uchraydi degan.
O‘shanda shu ahvolda bo‘lsa ham suratga olish jarayonlarining oxirigacha ishtirok etgan. Eslasam yig‘layman, juda yomon bo‘lib ketaman, onaga qiyin”, — deydi aktrisaning onasi.
Bundan tashqari, aktrisa Rossiyada bo‘lib o‘tayotgan “Quvnoqlar va zukkolar” o‘yini jarayonida ham qattiq yiqilganini yodga oladi.
“Sahnaga chiqqanimizda butun tanam bilan orqaga qarab yiqilib ketganman. Butun zaldagi tomoshabinlar qo‘rqib ketishgan. Hatto Maslyakov ham xavotirga tushgan. Shunda zo‘rg‘a o‘zimni tutib, joyimdan turganimda jamoamiz sardori ‘O‘zingni qo‘lga ol, faqat yig‘lab yuborma’, deganida ko‘z yoshlarimni tiyib, yuzimni qo‘lim bilan yashirib olganman. Suratga olish ishlari tugaganida esa sahna ortiga o‘tib, og‘riqdan rosa yig‘laganman”, — deydi aktrisa.
Zilola G‘ulomova
Zilola G‘ulomova “Zebo” serialining suratga olish jarayonida ehtiyotsizligi sabab oyog‘ini sindirib olgan.
“Azizlar, bu piar ham, suratga olish jarayonlari uchun ham qilingan emas. Bu videoni qo‘yishimning o‘ziga yarasha sabablari bor, chunki hozirgi kunda har bir qilayotgan ishingizni, aytayotgan gapingizni isbotlab bermasangiz qiyin. Mayli, hech qisi yo‘q. ‘Zebo’ serialining suratga olish jarayonida ehtiyotsizligim sababli oyog‘im toyib yiqilib tushdim. Yaxshilikka, hammasi yaxshi, endi o‘rganamiz, xafa bo‘lish, chekinish yo‘q”, — deydi aktrisa.
Nigina Anorboyeva
Nigina Anorboyeva Hosila Rahimovaning “Qurya-qur” klipining suratga olish jarayonida iyak qismidan qattiq jarohat olgan. Aktrisa mingan ot juda hurkak bo‘lgan, ijodkorlar bu haqda uni ogohlantirgan. Shunga qaramay aktrisa otdan qo‘rqib uni hurkitgan, ot esa uni uzoq masofaga olib ketgan va bir joyda to‘satdan to‘xtab aktrisani irg‘itib yuborgan. Natijada aktrisa otdan qattiq yiqilgan va uning iyak qismi jarohatlangan.
Parizoda
Raqs san’atida o‘z o‘rniga ega bo‘lgan raqqosa Parizoda to‘y xizmatlarining birida boshi aylanishi sababli yiqilib tushgan. Bu kabi holatlar Parizodaning kasbiy faoliyati davomida bir necha bor takrorlangan.
Feruza Normatova
Instabloger, aktrisa Feruza Normatova 2021-yilda Turkiyaga sayohatga borgan va u yerda video olayotgan vaqtda oyog‘i sirpanib yiqilib tushgan. Keyinroq aktrisa ahvolining yaxshi ekani haqida muxlislariga ma’lum qilgan.
Mavzuga doir:
- Bonu, Afsona, Diyor Mahkamov va boshqa san’atni tark etgan mashhurlar bugun nima ish bilan band? (video)
- Ukrain, rus, qozoq va eroniy — o‘zga millat vakili bo‘lsa-da, sof o‘zbek tilida ijod qilayotgan mashhurlar (foto)
- Ruslan Sharipov, Husniddin Xoliqov va qo‘shiqlari farzandlari tomonidan qayta kuylangan boshqa marhum san’atkorlar (video).
- Hamon oila qurmay, oq otdagi shahzodasini kutayotgan o‘zbekistonlik san’atkorlar (video).
Izoh (0)