Instagram tarmog‘ining ayrim sahifalarida xonanda Shahzoda san’atni butunlay tark etgani haqidagi ma’lumotlar tarqaldi. Shahzodaning uzoq yillik prodyuseri Davron Muqimov “Daryo” muxbiri Nargiza Murodovaga bu xabarlar mutlaqo yolg‘on ekanligini ma’lum qildi.
Xonandaning o‘zi ham mazkur postga munosabatini bildirdi.
— Shahzodaning san’atdagi faoliyatiga 20 yil bo‘lgan bo‘lsa, men u bilan 18 yil birga ishladim. O‘tgan 20 yil davomida u tinimsiz mehnat qildi, deb bemalol aytolaman. Yakkaxon konsert, klip va yangi qo‘shiqlarning ketma-ketligi uzilmagan. U bir kun ham dam olmagan san’atkorlar ro‘yxatiga kiradi. Hatto homilador bo‘lganida ham, yakkaxon konsert dasturini bergan. Tug‘uruqdan keyin ham onalik ta’tiliga chiqmay, ijodini davom ettirgan.Ba’zi ijtimoiy tarmoq sahifalari o‘z obunachilarini ko‘paytirish maqsadida “Shahzoda san’atni butunlay tark etdi”, degan yolg‘on xabar tarqatishgan. Eng qizig‘i, bu gaplarni go‘yoki men aytganmishman. Ochig‘ini aytaman, aynan shu masalada men bilan hech kim bog‘lanmadi va Shahzodaning san’atni tark etishi haqida hech kimga ma’lumot berganim yo‘q. Bu mutlaqo yolg‘on ma’lumot, — deydi Davron Muqimov.
Prodyuser Davron Muqimov Shahzoda bilan jiddiy tortishib qolgani haqida mish-mishlarga ham oydinlik kiritdi.
— Shou-biznesda uzoq vaqt birga ishlash juda qiyin. Ammo men Shahzoda bilan 18 yil birga ishladim. Bu qisqa muddat emas. Buning sababiga ko‘pchilik qiziqadi. Shahzoda bilan o‘rtamizda boshliq va ishchi degan tushuncha bo‘lmagan. U bilan yaqin do‘st va opa-ukadek bo‘lib ketganmiz. Garchi hozircha u ijod qilmayotgan bo‘lsa-da, o‘rtamizdagi munosabatlar saqlanib qolgan. Oilaviy do‘stmiz, qo‘ng‘iroqlashib, uchrashib hol-ahvol so‘raymiz. U har bitta qilayotgan loyihamni birinchilardan bo‘lib ko‘rib, o‘z munosabatini bildiradi, — deydi Davron Muqimov.
Ijodiy tanaffus sabab odamlar orasida “U kuchli depressiyaga tushib qolgan” kabi gap-so‘zlar tarqalmoqda. Uning ijoddan chekinishiga asosiy sabab nima ekanligini ochiqlay olasizmi?
— Bugungi kunda Shahzoda hordiq chiqarmoqda. U qachondan ijodga qaytishi haqida ham ma’lumot berolmayman. Chunki u ich-ichidan ijodga qaytishni istashi kerak. Sog‘inib sahnaga qaytgandagina, u haqiqiy ijod bo‘ladi. Muxlislarga faqat bir narsani aytolaman. Balki Shahzodaning ijodga qaytishiga ilhomning yetishmayotgani sabab bo‘lishi ham mumkin. Ishonchim komilki, u sahnaga qaytsa, san’atimizda haqiqiy “portlash” bo‘ladi, — deydi xonanda Shahzodaning prodyuseri Davron Muqimov.
Mavzuga doir:
- San’atni tark etganini aytgan, biroq ma’lum muddatdan so‘ng yana ijodga qaytgan o‘zbek shou-biznesi vakillari (video)
- “Boshqa yo‘nalishlarda rivojlanmoqchiman”. Durdona Qurbonova san’atni tark etishini ma’lum qildi (video)
- Shou-biznesni tark etgan “Ummon”chi Shohrux shou-biznesdan ketganlar va Jahongir Otajonov haqida gapirayotganlarga munosabat bildirdi (video)
- Dildora Niyozovaning turmush o‘rtog‘i uning san’atni butunlay tark etgani hamda to‘ylarga chiqmasligini ma’lum qildi. Xonandaning o‘zi bu gaplarni inkor etdi (video)
Izoh (0)