“O‘zbekneftegaz” AJ boshqaruvi raisi Mehriddin Abdullayev boshchiligidagi “Ishchi guruh” a’zolari import o‘rnini bosuvchi neft mahsulotlari va uglevodorod xom ashyolarini ishlab chiqarilishi, mahsulotni saqlash, sotish hamda yetkazib berish jarayonlari bilan tanishish maqsadida “Uzbekistan GTL” zavodida bo‘ldi.
Tashrif davomida boshqaruv raisi “Uzbekistan GTL” zavodi texnik direktori Marsel Yurgen Krauze va “Ishchi guruh” a’zolari bilan birgalikda GTL zavodidagi qurilmalarning bugungi ish faoliyatini joyiga chiqqan holda o‘rgandi. Shu bilan bir birga ishlab chiqarish ko‘rsatkichlari ham muhokama qilindi.
“Uzbekistan GTL” zavodida faoliyat olib borayotgan xorijlik mutaxassis zavodning ishlab chiqarish jarayonlari bir maromda davom etayotgani va bu o‘ziga xos muvaffaqiyat ekanligini ta’kidlab, qurilmalarni sanoat xavfsizligi mezon va qoidalariga qat’iy rioya etilayotgani, ekspluatatsiya qilish, qurilmalardagi asbob-uskunalarni ish faoliyati doimiy monitoring qilinayotgani bo‘yicha hisobot va ma’lumotlar berdi.
Boshqaruv raisi tomonidan ekspluatatsiya davrini uzaytirish uchun o‘rganishlar olib borish va qurilmalarda faoliyat yuratayotgan xodimlarni doimiy ravishda bilim va malakalarini oshirib borishga qaratilgan ko‘rsatmalar berildi.
“Uzbekistan GTL” zavodi bosh direktorning birinchi o‘rinbosari Odiljon Karimov 2022-yilning yanvar-iyul oylarida o‘tkazilgan suhbatlar natijasida Qarshi muxandislik iqtisodiyoti institutining 37 nafar, Toshkent davlat texnika universitetining 25 nafar, Toshkent kimyo texnologiya institutining 16 nafar va boshqa oliy ta’lim muassasalarining 22 nafar bitiruvchilari tanlovlar asosida ish bilan ta’minlangani, ularning ishlab chiqarish jarayonlariga allaqachon moslashib ketganini bildirdi.
Shundan so‘ng, “Ishchi guruh” a’zolari tomonidan zavodda sintetik dizel yoqilg‘isi ishlab chiqarish va saqlash holatlari o‘rganildi hamda sotish ishlari bo‘yicha amalga oshirilayotgan ishlar holati tahliliy ko‘rib chiqildi.
Boshqaruv raisi GTL dizel yoqilg‘isi sotilishi boshlanganini ta’kidlab, qisqa muddat ichida jami 30 ming tonnaga yaqin sintetik dizel mahsuloti O‘zbekiston Respublikasi tovar-xom ashyo birjasi savdosi platformasi orqali realizatsiya qilinganini e’tirof etdi. Qo‘shimcha ravishda nafta mahsulotini ishlab chiqarish hajmini oshirishga doir vazifalar belgilab berildi.
Ishlab chiqarishni mahalliylashtirish va kengaytirish doirasida 2022-yil 22-iyul kuni Buxoro neftni qayta ishlash zavodida sintetik “GTL” naftasining birinchi partiyasi qabul qilingan bo‘lib, har oyda 5 ming tonna “GTL” sintetik naftasi yetkazib berish va ishlab chiqarilgan mahsulotlar, birinchi navbatda, respublikaning neft mahsulotlariga bo‘lgan ichki ehtiyojlarini qoplash bo‘yicha vazifalar belgilab berildi.
“Uzbekistan GTL” zavodida mavjud generatorlardan ishlab chiqarilayotgan elektr energiyasidan “Sho‘rtan gaz-kimyo majmuasi” texnologik jarayonlarini va Sho‘rtan neft va gaz qazib chiqarish boshqarmasi obyektlarini, “BATEMAN”, “KMPO” va “Shimoliy Nishon” siquv kompressor stansiyalarini uzluksiz elektr energiyasi bilan ta’minlash borasidagi ishlar holati ham o‘rganilldi.
Bundan tashqari, zavodning ishlab chiqarish sexlari boshliqlari va rahbar xodimlar ishtirokida ishchi yig‘ilish o‘tkazildi va sintetik yonilg‘i mahsulotlarini ishlab chiqarilishi uzluksizligini ta’minlash, iste’molchilarga o‘z vaqtida va sifatli yonilg‘i mahsulotlarni yetkazib berilishi bo‘yicha zaruriy ko‘rsatmalar berildi.
Zavodda faoliyat yuritayotgan ishchi-xodimlar bilan suhbat o‘tkazilib, ularning yashash va ishlash uchun yaratilgan sharoitlar o‘rganildi. Ishchi-xodimlarning takliflari bo‘yicha qo‘shimcha imkoniyatlar yaratilishi belgilab olindi.
Eslatib o‘tamiz, GTL zavodida yiliga 3,6 milliard metr kub tabiiy gaz qayta ishlanib, 1,5 million tonna tayyor suyuq mahsulotlar ishlab chiqariladi. Jumladan, 307 ming tonna aviakerosin, 724 ming tonna dizel yoqilg‘isi, 437 ming tonna nafta, 53 ming tonna suyultirilgan gaz tayyorlanadi.
“O‘zbekneftgaz” AJ matbuot xizmati
Izoh (0)