Bosh prokuratura huzuridagi departament tomonidan huquqni muhofaza qiluvchi boshqa idoralar bilan hamkorlikda o‘rta-maxsus va oliy ta’lim sohasida pora olish, firibgarlik, mansab vakolatini suiiste’mol qilish kabi jinoyatlarni sodir etishining oldini olish borasida muntazam ravishda tezkor-qidiruv tadbirlari o‘tkazib kelinmoqda.

Xususan, 2022-yilning o‘tgan davrida:

• oliy ta’lim muassasalariga o‘qishga kiritish bilan bog‘liq 127 ta jinoyat fosh etilib, 384 mln so‘m va 457 ming AQSH dollarining firibgarlik yoki pora sifatida qo‘lga kiritilishining oldi olindi;
• xorijiy davlatlardan o‘qishni O‘zbekistondagi oliy ta’lim muassasasiga ko‘chirib berishni va’da qilgan shaxslarning 34 ta jinoyati fosh etilib, huquqbuzarlar tomonidan 81,8 mln so‘m va 168,2 ming AQSH dollarining qo‘lga kiritilishiga chek qo‘yildi;
• kollej va texnikumlarga o‘qishga kiritish bilan bog‘liq 37 ta jinoyat fosh etilib, 22 mln so‘m va 27,5 ming AQSH dollari ashyoviy dalil sifatida olib qo‘yildi.

Hududlar kesimida tahlil qilganda, bu borada Andijonda – 29 ta, Farg‘onada – 27 ta, Toshkent shaharda – 26 ta, Samarqandda – 21 ta, Buxoro va Toshkent viloyatlarida – 17 tadan, Namangan hamda Sirdaryoda – 16 tadan, Surxondaryoda 9 ta, Jizzax, Qoraqalpog‘iston Respublikasi va Xorazmda – 6 tadan, Qashqadaryoda – 3 ta, Navoiy viloyatida – 1 ta jinoyat aniqlangan bo‘lib, huquqbuzarlik sodir etganlarning 17 nafari oliy ta’lim tizimida, 14 nafari kollej va litseylarda ishlasa, 169 nafari boshqa soha vakillari yoki fuqarolarni tashkil etgan.

Ayni paytda O‘zbekistonda oliy o‘quv yurtlariga kirish imtihonlari davom etar ekan, departament va huquqni muhofaza qiluvchi boshqa idoralar tomonidan ushbu yo‘nalishda korrupsiya holatlarining oldini olish borasida profilaktika va tezkor-qidiruv tadbirlari davom etadi.