Germaniya kansleri Olaf Shols mamlakatdagi atom elektr stansiyalari(AES)ning ishlash muddatini uzaytirish mumkin, deb hisoblamoqda. Bu haqda u Siemens Energy kompaniyasining Myulxaym-an-der-Rur shahridagi ishlab chiqarish maydoniga tashrifi chog‘ida aytib o‘tdi.
Sholsning tushuntirishicha, mamlakatda qolgan uchta AES faqatgina elektr energiyasi ishlab chiqarish va uning kichik bir qismi uchun zarur. “Biroq baribir buning ahamiyati katta bo‘lishi mumkin, chunki qayta tiklanadigan energiya manbalaridan foydalanish darajasi Germaniyaning alohida federal shtatlarida bir birdan farq qiladi”, — dedi Germaniya hukumati rahbari. Xususan, Bavariyada shamol energetikasining rivojlanishi juda sekin, deya qo‘shimcha qildi u.
“Elektr uzatish liniyalarining kuchini oshirish va janubga uzatish tarmog‘ini kengaytirish rejadagidek tez amalga oshmayotganiga sabab ham shu”, — dedi Germaniya kansleri. Shunga qaramay, u mazkur masalada nemis rasmiylari “butun mamlakat nomidan harakat qilishini” ta’kidladi.
Ayni damda Germaniya hukumati mamlakatdagi qolgan uchta atom elektr stansiyasining ishlash muddatini uzaytirish masalasini muhokama qilmoqda. Oldinroq Germaniya Vazirlar Mahkamasi matbuot kotibi o‘rinbosari Kristian Xofmann Shols bu masala bo‘yicha yakuniy qaror qabul qilishdan oldin energiya ta’minoti xavfsizligi bo‘yicha ikkinchi stress-test natijalarini kutmoqchiligini ma’lum qilgandi.
Germaniya hukumati 2011-yilda Yaponiyaning “Fukusima-1” AESda yuz bergan halokatga munosabat sifatida atom energiyasidan voz kechishga qaror qilgandi. 2022-yilning yanvar oyida Germaniyadagi oltita AESdan uchtasi tarmoqdan uzilgan. Hozir mamlakatda uchta atom elektr stansiyasi mavjud. Ular 2023-yil boshida o‘chirilishi kutilmoqda.
Avval Shols AESning ishlash muddatini uzaytirishga qarshi edi.
Izoh (0)