Германия канцлери Олаф Шольц мамлакатдаги атом электр станциялари(АЭС)нинг ишлаш муддатини узайтириш мумкин, деб ҳисобламоқда. Бу ҳақда у Siemens Energy компаниясининг Мюлхайм-ан-дер-Рур шаҳридаги ишлаб чиқариш майдонига ташрифи чоғида айтиб ўтди.
Шольцнинг тушунтиришича, мамлакатда қолган учта АЭС фақатгина электр энергияси ишлаб чиқариш ва унинг кичик бир қисми учун зарур. «Бироқ барибир бунинг аҳамияти катта бўлиши мумкин, чунки қайта тикланадиган энергия манбаларидан фойдаланиш даражаси Германиянинг алоҳида федерал штатларида бир бирдан фарқ қилади», — деди Германия ҳукумати раҳбари. Хусусан, Баварияда шамол энергетикасининг ривожланиши жуда секин, дея қўшимча қилди у.
«Электр узатиш линияларининг кучини ошириш ва жанубга узатиш тармоғини кенгайтириш режадагидек тез амалга ошмаётганига сабаб ҳам шу», — деди Германия канцлери. Шунга қарамай, у мазкур масалада немис расмийлари «бутун мамлакат номидан ҳаракат қилишини» таъкидлади.
Айни дамда Германия ҳукумати мамлакатдаги қолган учта атом электр станциясининг ишлаш муддатини узайтириш масаласини муҳокама қилмоқда. Олдинроқ Германия Вазирлар Маҳкамаси матбуот котиби ўринбосари Кристиан Хофманн Шольц бу масала бўйича якуний қарор қабул қилишдан олдин энергия таъминоти хавфсизлиги бўйича иккинчи стресс-тест натижаларини кутмоқчилигини маълум қилганди.
Германия ҳукумати 2011 йилда Япониянинг «Фукусима-1» АЭСда юз берган ҳалокатга муносабат сифатида атом энергиясидан воз кечишга қарор қилганди. 2022 йилнинг январь ойида Германиядаги олтита АЭСдан учтаси тармоқдан узилган. Ҳозир мамлакатда учта атом электр станцияси мавжуд. Улар 2023 йил бошида ўчирилиши кутилмоқда.
Аввал Шольц АЭСнинг ишлаш муддатини узайтиришга қарши эди.
Изоҳ (0)