Senat yalpi majlisida “Ma’muriy javobgarlik to‘g‘risidagi kodeksining 206-1-moddasiga o‘zgartish kiritish haqida”gi qonun ko‘rib chiqildi. Bu haqda “Daryo” muxbiri xabar bermoqda.
Qonun muhokamasi jarayonida tazyiq o‘tkazgan, zo‘ravonlik sodir etgan yoki ularni sodir etishga moyil bo‘lgan shaxs tomonidan himoya orderi talablarini bajarmaslik uchun belgilangan jazo amalda jabrlanuvchiga yuk sifatida tushayotganligi qayd etildi.
Senat raisi Tanzila Norboyevaning aytishicha, himoya orderi masalasiga kompleks yondashish kerak.
Himoya orderi 2019-yildan O‘zbekiston qonunchiligiga yangilik bo‘lib kirgan. Bu davlatimiz tomonidan zo‘ravon kishini ogohlantirish demakdir. Agar himoya orderini bajarmaganlik uchun qonunda taklif qilinayotgan jarima miqdorini oshiradigan bo‘lsak, jabrdiydaning o‘ziga yuk bo‘ladi. Chunki jamiyatimizda ko‘p holatlarda ayollar turmush o‘rtog‘iga qaram hisoblanadi. O‘z navbatida, u oiladagi asosiy ta’minotchi. Agar jarima miqdorini oshiradigan bo‘lsak, u jarimani to‘laydi, ammo xotini, bolasini imkoniyati shu bilan chegaralanib qolishi mumkin. Boshqacha aytganda, oila boshlig‘i ayoliga “sen tufayli jarima to‘layapman, demak, boshqa mablag‘ kerak bo‘lsa ham bera olmayman”, deyishi mumkin.Majlis davomida oiladagi tazyiq va zo‘ravonlikning oldini olish uchun nafaqat javobgarlikni oshirish, balki birinchi navbatda ma’naviy, tarbiyaviy hamda oilani kelgusida har tomonlama moddiy va barkamol jihatdan yashab ketishini ta’minlash uchun tegishli tizimli va mantiqiy bog‘liq bo‘lgan ketma-ket choralarni keltirib chiqaruvchi qonun normalarni ishlab chiqish zarur ekanligi ta’kidlandi.Umuman olganda, jarimani erkakka yuklash jabr ko‘rgan ayolni ham jazolash, deb hisoblash mumkin. Shuning uchun biz 1995-yilda O‘zbekiston qo‘shilgan “Xotin-qizlar kamsitilishining barcha shakllariga barham berish to‘g‘risida”gi konvensiya talablariga ham qarashimiz kerak. Unda oilaga putur yetmaydigan og‘ir, bosiq jazo tayinlanishi zarurligi haqida tavsiyalar berilgan. Shuning uchun bu masalaga son nuqtayi nazaridan, miqdor nuqtayi nazaridan emas, kompleks yondashish kerak. Bizning maqsadimiz kimnidir jazolash emas, balki zo‘ravonlik holatlarining oldini olishdir. Shuning uchun bu qonunni rad etish to‘g‘risidagi fikrlarni to‘liq qo‘llab-quvvatlaymiz. O‘ylaymanki, hamma senatorlar ham buni qo‘llab-quvvatlaydi.
Tanzila Norboyeva, Senat raisi
Yuqoridagilarga asoslanib, senatorlar tomonidan “Ma’muriy javobgarlik to‘g‘risidagi kodeksining 206-1-moddasiga o‘zgartish kiritish haqida”gi qonunni rad qilish to‘g‘risida qaror qabul qilindi.
Izoh (0)