Qozog‘istonda mehnat ekspluatatsiyasi maqsadida majburan ushlab turilgan 10 nafar O‘zbekiston fuqarosi qutqarilib, vatanga qaytarildi. Bu haqda “Dunyo” AA xabar berdi.
“Dunyo” AA
Agentlik ma’lumotlariga ko‘ra, uch nafar O‘zbekiston fuqarosi mehnat ekspluatatsiyasi maqsadida majburan ushlab turilgan 10 nafar vatandoshlarni qutqarishda yordam so‘rab Olmaotadagi O‘zbekiston Bosh konsulligiga murojaat qilgan.
Murojaatchilar bir guruh mahalliy aholi o‘ldirish bilan tahdid qilib, ularni xususiy uyda ushlab, shaxsiy buyumlari va mobil telefonlarini olib qo‘yganini ma’lum qilgan.
Bosh konsullik xodimlari Olmaotadagi huquq-tartibot idoralari vakillari bilan birgalikda ushbu fuqarolar joylashgan hududga borib holatni o‘rgangan, shundan so‘ng, ularni Bo‘stonliq tuman politsiya bo‘limiga olib ketgan.
Gumonlanuvchilarga nisbatan Qozog‘iston Jinoyat kodeksining 389-moddasi bilan jinoyat ishi qo‘zg‘atilgan.
O‘zbekistonliklar esa “Rodnik” jamoatchilik jamg‘armasi bilan hamkorlikda uch mahal ovqatlantirish sharoitiga ega xostelga joylashtirilgan. Tergov tadbirlarini amalga oshirilib, o‘zbekistonliklarning pasport va shaxsiy buyumlari qaytarilgach, ular 1-avgust kuni avtovokzalga Olmaota—Toshkent yo‘nalishidagi reysga kuzatib qo‘yilgan.
Fuqarolar O‘zbekistonga eson-omon yetib kelgan.
Izoh (0)