Ijtimoiy tarmoqlarda Andijon viloyatining Oltinko‘l tuman tibbiyot birlashmasi rahbariyati ish vaqtida hamshiralarni majburiy mehnatga jalb etgani aytilgan xabar tarqaldi. “Daryo” muxbiri mazkur holatga aniqlik kiritish maqsadida Oltinko‘l tuman tibbiyot birlashmasi boshlig‘i Azamatjon Mamajonov bilan bog‘landi.
“Mustaqillik bayrami oldidan viloyatimiz bo‘ylab ‘Obodonlashtirish va ko‘kalamzorlashtirish oyligi’ o‘tkazilmoqda. Shu munosabat bilan barcha tashkilotlarning texnik xodimlari tomonidan tegishli ishlar amalga oshirilmoqda. Jumladan, birlashmaga qarashli barcha tibbiyot muassasalarida ham texnik xodimlar tomonidan belgilangan ish vaqtlarida tozalash va boshqa ishlar amalga oshirilmoqda. Ijtimoiy tarmoqlarda 4-avgust kuni ‘hamshiralar ish joyida emas, obodonlashtirishga jalb qilingan’, degan xabar tarqaldi.
Eshitgan chog‘imizdayoq, ushbu masalani zudlik bilan o‘rganishga kirishdik. O‘rganish davomida haqiqatan ham tuman ko‘p tarmoqli markaziy poliklinika hududida obodonlashtirish ishlari olib borilganligi, ushbu ishlarga farroshlar va boshqa texnik xodimlar jalb qilinganligi aniqlandi. O‘zingiz bilasiz farroshlarimiz, ya’ni xalq tilida aytganda ‘sanitarka’lar ham ish vaqtida belgilangan oq formalarda yurishadi. Shu ‘sanitarka’larimiz tozalovga chiqqanlarida almashtirishga erinib, oq xalatda ish qilgan. Obodonlashtirish ishlariga shifokorlardan ham, hamshiralardan ham birortasi jalb qilinmagan. Aksincha ular o‘z xonalarida bemorlarni ko‘rikdan o‘tkazishayotgan bo‘lgan. Shunday bo‘lsa-da ushbu jarayonda qatnashgan va xatoga yo‘l qo‘ygan poliklinikaning ikki nafar katta hamshirasiga nisbatan jazo choralari ko‘rilishi belgilangan.
Bundan tashqari tumandagi barcha tibbiyot muassasalari rahbarlaridan xodimlarini majburiy mehnatga jalb qilmaslik talab qilinib, agarda mana shunday xatolarga yo‘l qo‘yilgan taqdirda jazoga tortilishi bo‘yicha tushuntirishlar berilmoqda”, — deydi tuman tibbiyot birlashmasi boshlig‘i Azamatjon Mamajonov.
Izoh (0)