Senatning 29-yalpi majlisida “Uy-joy kodeksini tasdiqlash to‘g‘risida”gi qonun muhokama qilindi. Bu haqda “Daryo” muxbiri xabar bermoqda.
Majlisda kodeksni ishlab chiqishda qator ijobiy maqsadlar ko‘zlangani, ammo hujjatda ayrim normalarni qo‘llash mexanizmlari yetarlicha ochib berilmagani ta’kidlandi. Jumladan, mahalliy davlat hokimiyati organlarining davlat uy-joy fondidagi turar joylarni yuridik shaxslarga belgilangan maqsadda foydalanish uchun ijara shartnomasi shartlari asosida berish vakolatini amalga oshirish tartibi belgilanmagan. Bu esa hokimiyat vakolatlarini suiste’mol qilish va boshqa korrupsion holatlarga shart-sharoitlar yaratib beradi.
Muhokama jarayonida Senat raisi Tanzila Norboyeva mazkur kodeks bo‘yicha fikrlarini bildirdi.
“Qonunlar xalqimiz hayotini yengillashtirishga, odamlarimiz manfaatlariga xizmat qilishi kerak. Har bir inson qonunni o‘qib, uning haq-huquqlari qay darajada himoyalanganligi aniq qilib ko‘rsatilishi kerak. Hozir ma’ruzada ham eshitdingiz, Uy-joy kodeksida 90 dan ortiq havolaki norma mavjudligi aytildi.
“Normativ huquqiy hujjatlar to‘g‘risida”gi qonunga ko‘ra, qonunlarda havolaki normalar bo‘lishi mumkin. Lekin ularning qo‘llanilishi asosli va maqsadga muvofiq bo‘lishi kerak. Bu juda muhim talab. Biroq afsuski, kodeksni tayyorlash jarayonida bu jihatga yetarlicha e’tibor qaratilmagan – tahlil qilinmagan. Qolaversa, havolaki normalar ertaga tor idoraviy manfaatlarga xizmat qiladigan vositaga aylanib qolishi mumkin. Amaliyotda bunday holatlarni ko‘p ko‘ryapmiz”, – dedi Senat rahbari.
Ma’lum qilinishicha, mulkdorlar bilan shartnoma asosida turar joy buzilishi va uning o‘rnida yangi turar joy qurilishi mumkinligi, shartnoma notarial tartibda tasdiqlanishi va turar joyni qurish uchun zarur ruxsatnoma olinganidan keyin kuchga kirishi kodeksda aks ettirilgan bo‘lsa-da, shartnomaning qaysi turi haqida so‘z yuritilayotganligi mavhum qolgan. Mazkur masalalar shartnomaviy huquqiy munosabatlarni tartibga soluvchi “Fuqarolik kodeksi”da ham o‘z aksini topmagan. Shu bilan birga, qonunchilik texnikasi qoidalariga lozim darajada rioya qilinmagan. Ba’zi normalar bir-biriga zid. Qator moddalar bilan davlat organlariga diskretsion (cheklanmagan) vakolatlar berilgan hamda kodeksda qo‘llanilgan bir qator havolaki normalar yetarli asoslarga ega emas. O‘z navbatida, ushbu holatlar turli salbiy oqibatlarga olib kelishi mumkin.
Muhokama yakunida kodeks jamiyat uchun muhim bo‘lgan ijtimoiy-iqtisodiy munosabatlarni tartibga solishini inobatga olinib, milliy qonun hujjatlari, ilg‘or xorijiy mamlakatlar tajribasi va huquqshunos olimlar fikrlarini chuqur tahlil etilgan holda, kodeksni takomiliga yetkazish maqsadga muvofiq deb topildi. Shu bois, kodeks senatorlar tomonidan rad etildi.
Izoh (0)