Сенат ялпи мажлисида «Маъмурий жавобгарлик тўғрисидаги кодексининг 206-1-моддасига ўзгартиш киритиш ҳақида»ги қонун кўриб чиқилди. Бу ҳақда «Дарё» мухбири хабар бермоқда.
Қонун муҳокамаси жараёнида тазйиқ ўтказган, зўравонлик содир этган ёки уларни содир этишга мойил бўлган шахс томонидан ҳимоя ордери талабларини бажармаслик учун белгиланган жазо амалда жабрланувчига юк сифатида тушаётганлиги қайд этилди.
Сенат раиси Танзила Норбоеванинг айтишича, ҳимоя ордери масаласига комплекс ёндашиш керак.
Ҳимоя ордери 2019 йилдан Ўзбекистон қонунчилигига янгилик бўлиб кирган. Бу давлатимиз томонидан зўравон кишини огоҳлантириш демакдир. Агар ҳимоя ордерини бажармаганлик учун қонунда таклиф қилинаётган жарима миқдорини оширадиган бўлсак, жабрдийданинг ўзига юк бўлади. Чунки жамиятимизда кўп ҳолатларда аёллар турмуш ўртоғига қарам ҳисобланади. Ўз навбатида, у оиладаги асосий таъминотчи. Агар жарима миқдорини оширадиган бўлсак, у жаримани тўлайди, аммо хотини, боласини имконияти шу билан чегараланиб қолиши мумкин. Бошқача айтганда, оила бошлиғи аёлига «сен туфайли жарима тўлаяпман, демак, бошқа маблағ керак бўлса ҳам бера олмайман», дейиши мумкин.Мажлис давомида оиладаги тазйиқ ва зўравонликнинг олдини олиш учун нафақат жавобгарликни ошириш, балки биринчи навбатда маънавий, тарбиявий ҳамда оилани келгусида ҳар томонлама моддий ва баркамол жиҳатдан яшаб кетишини таъминлаш учун тегишли тизимли ва мантиқий боғлиқ бўлган кетма-кет чораларни келтириб чиқарувчи қонун нормаларни ишлаб чиқиш зарур эканлиги таъкидланди.Умуман олганда, жаримани эркакка юклаш жабр кўрган аёлни ҳам жазолаш, деб ҳисоблаш мумкин. Шунинг учун биз 1995 йилда Ўзбекистон қўшилган «Хотин-қизлар камситилишининг барча шаклларига барҳам бериш тўғрисида»ги конвенция талабларига ҳам қарашимиз керак. Унда оилага путур етмайдиган оғир, босиқ жазо тайинланиши зарурлиги ҳақида тавсиялар берилган. Шунинг учун бу масалага сон нуқтаи назаридан, миқдор нуқтаи назаридан эмас, комплекс ёндашиш керак. Бизнинг мақсадимиз кимнидир жазолаш эмас, балки зўравонлик ҳолатларининг олдини олишдир. Шунинг учун бу қонунни рад этиш тўғрисидаги фикрларни тўлиқ қўллаб-қувватлаймиз. Ўйлайманки, ҳамма сенаторлар ҳам буни қўллаб-қувватлайди.
Танзила Норбоева, Сенат раиси
Юқоридагиларга асосланиб, сенаторлар томонидан «Маъмурий жавобгарлик тўғрисидаги кодексининг 206-1-моддасига ўзгартиш киритиш ҳақида»ги қонунни рад қилиш тўғрисида қарор қабул қилинди.
Изоҳ (0)