Senat raisi: Davlat qarziga oid qonun ijrosi nazoratda bo‘ladi va doimiy monitoring qilinadi

Davlat qarziga oid qonun ijrosi nazoratda bo‘ladi va doimiy monitoring qilinadi. Bu haqda bugun, 4-avgust kuni bo‘lib o‘tayotgan parlament yuqori palatasi yalpi majlisida Senat raisi Tanzila Norboyeva ma’lum qildi, deya xabar bermoqda “Daryo” muxbiri.

Senatda “Davlat qarzi to‘g‘risida”gi qonun muhokama qilindi. Majlis jarayonida Tanzila Norboyeva Hisob palatasi vakiliga “Hisob palatasi oldiga qo‘yilgan vazifalarni bajarish jarayonida bu sohada qanday tizimli kamchiliklarni aniqlagan va bu kamchiliklarga yo‘l qo‘ymaslik va ularni bartaraf etish uchun ushbu qonun normalari – mexanizmlar yetarlimi?”, degan savol bilan murojaat qildi.

Hisob palatasi vakilining ma’lum qilishicha, davlat qarzi sifatida olingan mablag‘lar qanday sarflanayotgani tahliliy o‘rganib chiqilmoqda. Amalga oshirilayotgan loyihalar bo‘yicha sarflanayotgan mablag‘lar haqidagi ma’lumotlar parlamentga ham taqdim etilgan. Bu borada ayrim kamchiliklarga yo‘l qo‘yilmoqda. Loyihani amalga oshirish bo‘yicha tegishli guruhlar bor. Lekin ular malaka va tajribaga ega emas. Vazirlik va idoralarda ichki nazorat tizimlari yaxshi yo‘lga qo‘yilmagan. Bularning oldini olish uchun takliflar tayyorlandi.

Mazkur qonun haqiqatan ham mamlakatimiz rivojining bugungi bosqichida nihoyatda muhim ahamiyatga ega. Ko‘zlangan maqsadlarga erishishda ichki imkoniyatlar bilan bir qatorda tashqaridan ham moliyaviy resurslarni jalb qilish butun dunyo davlatlarida keng tarqalgan tajriba hisoblanadi.

Prezidentimiz ta’kidlaganidek: “tashqi qarz hammaga ham berilavermaydi, buning uchun mamlakatning tashqi dunyodagi nufuzi va unga nisbatan ishonch bo‘lishi kerak”. O‘zbekiston xalqaro hamjamiyat ko‘z o‘ngida islohotlarga intiluvchi davlat, ishonchli hamkor sifatida namoyon bo‘lmoqda. Biroq shunday bo‘lsada, har sohada aniq hisob-kitob va tabiiyki mustahkam huquqiy asos bo‘lishi kerak. Shu ma’noda, “Davlat qarzi to‘g‘risida”gi qonun ushbu yo‘nalishdagi ishlarimizning to‘g‘ri, haqqoniy, manfaatli va albatta ochiq, shaffof bo‘lishiga xizmat qiladi. Qonunda davlat qarzini boshqarish bo‘yicha parlament vakolatlari ham belgilanyapti.

Davlat qarzini boshqarish strategiyasi amalga oshirilishi, jalb qilingan mablag‘lardan maqsadli va samarali foydalanilishi, loyihalar natijadorligi kabi muhim jihatlar doimiy diqqat markazimizda bo‘ladi. Bu masala mahalliy kengashlarning ham nazoratida bo‘lishi kerak. Bu katta ishonch va har birimizdan alohida mas’uliyat va faollik talab qilishini o‘ylaymanki har biringiz to‘g‘ri anglab turibsiz. Shunday ekan, men yana bir bor barchangizni mamlakatimiz, xususan hududlarni ijtimoiy-iqtisodiy rivojlantirishga doir dasturiy vazifalarning ijro etilishi holatlariga befarq bo‘lmaslikka chaqirib qolaman. Qonun qabul qilinganidan keyin uning ijrosi bilan bog‘liq tadbirlarni monitoring qilib borishimiz kerak.

Tanzila Norboyeva, Oliy Majlis Senati raisi