Andijon viloyatining Asaka tumanidagi do‘konlarning birida yong‘in chiqdi. Bu haqda viloyat Favqulodda vaziyatlar boshqarmasi axborot xizmati xabar berdi.
Ma’lum qilinishicha, kecha, 3-avgust kuni soat 12:27 da Asaka tumani Favqulodda vaziyatlar bo‘limi qisqa raqamiga “Oilaviy biznes samarasi” korxonasiga tegishli “Beruniy” mahallasi, Imom Buxoriy ko‘chasida joylashgan savdo do‘konida yong‘in bo‘layotganligi haqida xabar kelib tushgan.
Voqea joyiga 2 ta yong‘in qutqaruv ekipaji soat 12:30 da yetib borgan.
Maskanga ikki tomonlama elektr toki kelganligi ma’lum bo‘lgach, zudlik bilan hududiy elektr tarmoqlari mutaxassislari chaqirtirilib, ular tomonidan 0,4 kV (380) kuchlanishli elektr tarmog‘idan to‘liq uzilgandan so‘ng yong‘in qisqa muddatlarda to‘liq bartaraf etilgan.
Yong‘in natijasida yon-atrofdagi bino inshootlarga zarar yetmagan. Hodisa oqibatida tan jarohati olgan va halok bo‘lganlar yo‘q. Hozirda yong‘in yuzasidan surishtiruv ishlari olib borilmoqda.
Izoh (0)