2022-yil 4-avgust kuni O‘zbekiston tashqi ishlar vaziri v.b. Vladimir Norov Ko‘rfaz arab davlatlari hamkorlik kengashi bosh kotibi Naif al-Hajraf bilan uchrashdi.

Uchrashuvda so‘nggi yillarda O‘zbekiston bilan Ko‘rfaz arab davlatlari hamkorlik kengashi va unga a’zo mamlakatlar o‘rtasidagi munosabatlar sezilarli darajada faollashib, yangi amaliy mazmun bilan boyib borayotgani ta’kidlandi.

Ilgari erishilgan kelishuvlar, jumladan, 2021-yilda imzolangan O‘zbekiston Tashqi ishlar vazirligi va Ko‘rfaz arab davlatlari hamkorlik kengashi Bosh kotibiyati o‘rtasida o‘zaro maslahatlashuvlar mexanizmi bo‘yicha Anglashuv memorandumi doirasidagi kelishuvlarni amalga oshirishning borishi ko‘rib chiqildi.

N.Hajraf Ko‘rfaz arab davlatlari hamkorlik kengashi O‘zbekistonni mintaqadagi asosiy davlatlardan biri deb bilishini hamda mamlakatda amalga oshirilayotgan islohotlarni yuksak baholashini ta’kidladi. Kengashning O‘zbekiston bilan hamkorlik qilishida mavjud ulkan salohiyatdan yanada samarali foydalanish hamda tomonlarni qiziqtirgan barcha sohalarda aloqalarni yo‘lga qo‘yish bo‘yicha chora-tadbirlar ko‘rishga tayyorligi ta’kidlandi.

Bo‘lajak tadbirlar jadvali yuzasidan fikr almashildi. Ikki mintaqa o‘rtasidagi aloqalarni mustahkamlashga xizmat qiladigan Markaziy Osiyo – Ko‘rfaz arab davlatlari hamkorlik kengashi strategik muloqotining 2022-yildagi birinchi yig‘ilishiga tayyorgarlik ko‘rishga alohida e’tibor qaratildi.

Xalqaro va mintaqaviy dolzarb masalalar, jumladan, Afg‘onistondagi vaziyat muhokama qilindi. Ko‘rfaz arab davlatlari hamkorlik kengashi bosh kotibi yaqinda Toshkentda bo‘lib o‘tgan Afg‘oniston bo‘yicha xalqaro konferensiya yakunlarini ijobiy baholadi. O‘zbekiston tomonidan ushbu mamlakatga ijtimoiy-iqtisodiy va gumanitar yordam ko‘rsatish borasida amalga oshirilayotgan amaliy ishlar muhimligi qayd etildi.