Андижон вилоятининг Асака туманидаги дўконларнинг бирида ёнғин чиқди. Бу ҳақда вилоят Фавқулодда вазиятлар бошқармаси ахборот хизмати хабар берди.
Маълум қилинишича, кеча, 3 август куни соат 12:27 да Асака тумани Фавқулодда вазиятлар бўлими қисқа рақамига «Оилавий бизнес самараси» корхонасига тегишли «Беруний» маҳалласи, Имом Бухорий кўчасида жойлашган савдо дўконида ёнғин бўлаётганлиги ҳақида хабар келиб тушган.
Воқеа жойига 2 та ёнғин қутқарув экипажи соат 12:30 да етиб борган.
Масканга икки томонлама электр токи келганлиги маълум бўлгач, зудлик билан ҳудудий электр тармоқлари мутахассислари чақиртирилиб, улар томонидан 0,4 кВ (380) кучланишли электр тармоғидан тўлиқ узилгандан сўнг ёнғин қисқа муддатларда тўлиқ бартараф этилган.
Ёнғин натижасида ён-атрофдаги бино иншоотларга зарар етмаган. Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғин юзасидан суриштирув ишлари олиб борилмоқда.
Изоҳ (0)