Toshkentda Orolbo‘yi mintaqasini rivojlantirish choralari muhokama qilindi

Bosh vazir o‘rinbosari — investitsiyalar va tashqi savdo vaziri Jamshid Xo‘jayev 2-avgust kuni BMTning O‘zbekistondagi doimiy koordinatori Roli Astxana bilan uchrashdi, deb xabar bermoqda vazirlik matbuot xizmati.

Ma’lum qilinishicha, suhbat davomida Orolbo‘yi mintaqasida aholi turmush darajasini yaxshilashga qaratilgan loyihalarni amalga oshirish borasidagi hamkorlik, shuningdek, Orolbo‘yi mintaqasi uchun BMTning Inson xavfsizligi bo‘yicha ko‘p tomonlama sheriklik Trast jamg‘armasi doirasida hamkorlikni rivojlantirish masalalari muhokama qilindi.

Xususan, tomonlar BMT Bosh Assambleyasining “Orolbo‘yi mintaqasini ekologik innovatsiyalar va texnologiyalar zonasi deb e’lon qilish to‘g‘risida”gi qarorini bajarish maqsadida qabul qilingan Orolbo‘yi mintaqasining ekologik muvozanati va ijtimoiy-iqtisodiy rivojlanishini ta’minlash bo‘yicha ko‘p tomonlama “Yo‘l xaritasi”ni amalga oshirish jarayonini ko‘rib chiqqan. Hujjatda 14 ta ustuvor yo‘nalish va 230 ta loyihaviy takliflar mavjud bo‘lib, ularning umumiy qiymati 210 million dollarni tashkil etadi.

Tomonlar mintaqaga investitsiyalarni yanada jalb qilishning muhimligi va Trast jamg‘armasi faoliyatini kengaytirish istiqbollarini ham muhokama qilgan. Qayd etilishicha, bugungi kunga qadar jamg‘arma strategiyasi doirasida Orolbo‘yi mintaqasini ijtimoiy-iqtisodiy rivojlantirish ustuvor yo‘nalishlariga muvofiq turli loyihalarni moliyalashtirish uchun 244 million dollarga yaqin mablag‘ jalb qilingan. Bundan tashqari, jamg‘arma tomonidan 5 ta qo‘shma dastur moliyalashtirildi, bu esa o‘z navbatida Qoraqalpog‘istonning 48 ming aholisining hayot sifati yaxshilanishiga ijobiy ta’sir ko‘rsatdi.

Tomonlar jamg‘armaning 2024—2030-yillarga mo‘ljallangan faoliyatining keyingi bosqichini amalga oshirishga sodiqligini bildirdi. Shu munosabat bilan Jamg‘armaning yangi strategiyasi ishlab chiqiladi va donorlarni jalb qilish bo‘yicha ishlar jadallashtiriladi.

Uchrashuv yakunida tomonlar muhokama qilingan yo‘nalishlar doirasida o‘zaro hamkorlik qilish bo‘yicha navbatdagi tadbirlarni, ustuvor masalalarni tezkor hal etish maqsadida birgalikda ish olib borishga kelishdi.