Бош вазир ўринбосари — инвестициялар ва ташқи савдо вазири Жамшид Хўжаев 2 август куни БМТнинг Ўзбекистондаги доимий координатори Роли Астхана билан учрашди, деб хабар бермоқда вазирлик матбуот хизмати.
Маълум қилинишича, суҳбат давомида Оролбўйи минтақасида аҳоли турмуш даражасини яхшилашга қаратилган лойиҳаларни амалга ошириш борасидаги ҳамкорлик, шунингдек, Оролбўйи минтақаси учун БМТнинг Инсон хавфсизлиги бўйича кўп томонлама шериклик Trast жамғармаси доирасида ҳамкорликни ривожлантириш масалалари муҳокама қилинди.
Хусусан, томонлар БМТ Бош Ассамблеясининг «Оролбўйи минтақасини экологик инновациялар ва технологиялар зонаси деб эълон қилиш тўғрисида»ги қарорини бажариш мақсадида қабул қилинган Оролбўйи минтақасининг экологик мувозанати ва ижтимоий-иқтисодий ривожланишини таъминлаш бўйича кўп томонлама «Йўл харитаси»ни амалга ошириш жараёнини кўриб чиққан. Ҳужжатда 14 та устувор йўналиш ва 230 та лойиҳавий таклифлар мавжуд бўлиб, уларнинг умумий қиймати 210 миллион долларни ташкил этади.
Томонлар минтақага инвестицияларни янада жалб қилишнинг муҳимлиги ва Trast жамғармаси фаолиятини кенгайтириш истиқболларини ҳам муҳокама қилган. Қайд этилишича, бугунги кунга қадар жамғарма стратегияси доирасида Оролбўйи минтақасини ижтимоий-иқтисодий ривожлантириш устувор йўналишларига мувофиқ турли лойиҳаларни молиялаштириш учун 244 миллион долларга яқин маблағ жалб қилинган. Бундан ташқари, жамғарма томонидан 5 та қўшма дастур молиялаштирилди, бу эса ўз навбатида Қорақалпоғистоннинг 48 минг аҳолисининг ҳаёт сифати яхшиланишига ижобий таъсир кўрсатди.
Томонлар жамғарманинг 2024—2030 йилларга мўлжалланган фаолиятининг кейинги босқичини амалга оширишга содиқлигини билдирди. Шу муносабат билан Жамғарманинг янги стратегияси ишлаб чиқилади ва донорларни жалб қилиш бўйича ишлар жадаллаштирилади.
Учрашув якунида томонлар муҳокама қилинган йўналишлар доирасида ўзаро ҳамкорлик қилиш бўйича навбатдаги тадбирларни, устувор масалаларни тезкор ҳал этиш мақсадида биргаликда иш олиб боришга келишди.
Мавзуга доир:
- Қорақалпоғистонда аҳоли саломатлигини муҳофаза қилиш янада кучайтирилади
- АҚШ Оролбўйи аҳолиси учун тиббий асбоб-ускуналар ва анжомларни ўз ичига олган гуманитар ёрдамни юборди
- Орол денгизи фалокати натижасида Марказий Осиёда иқлим ўзгариши дунё кўрсаткичларидан 2 баробар жадалроқ кечмоқда
- Оролбўйини «яшил ривожлантириш» учун 150 млн евро инвестиция киритилади
Изоҳ (0)