O‘zbekistonda 2021-yilda 3 769 ta korrupsiyaga oid jinoyat ishi sudlarga yuborilgan. Bu haqida Senatning Sud-huquq masalalari va korrupsiyaga qarshi kurashish qo‘mitasining navbatdagi yalpi majlis oldidan bo‘lib o‘tgan yig‘ilishida aytib o‘tildi.
Ma’lum qilinishicha, ushbu jinoyatlar oqibatida davlat va jamiyat manfaatlariga 1 trillion 282 milliard so‘m miqdorida moddiy zarar yetkazilgan. Ushbu ko‘rsatkich 2020-yilga nisbatan 3 baravarga oshgan.
Aksariyat korrupsiyaga oid jinoyatlar Sog‘liqni saqlash, Xalq ta’limi, Maktabgacha ta’lim, Oliy va o‘rta maxsus ta’lim vazirliklari hamda bank tizimi tashkilotlariga to‘g‘ri kelgan.
Hududlar kesimida Toshkent shahri, Surxondaryo, Navoiy, Andijon, Farg‘ona, Namangan, Qashqadaryo, Xorazm viloyatlari hamda Qoraqalpog‘iston Respublikasida eng yomon ko‘rsatkichlar qayd etilgan.
Bundan avval Senatning Budjet va iqtisodiy islohotlar masalalari qo‘mitasining yalpi majlis oldidan bo‘lib o‘tgan qo‘mita yig‘ilishida 2022-yil 6 oyida davlat xaridlarida budjet mablag‘larini talon-toroj qilish hamda boshqa korrupsiya ko‘rinishlari bilan bog‘liq 95 ta jinoyat fosh etilib, davlat manfaatlariga 55,2 milliard so‘m zarar yetkazilgani ma’lum qilingandi.
Izoh (0)