Toshkentda 8-sinf o‘quvchisi bilan jinsiy aloqa qilgan uch erkak muddatidan ilgari shartli ravishda ozod etildi. Bu haqda Telegram’dagi “Nemolchi.uz” loyihasi xabar berdi.
Eslatib o‘tamiz, 2021-yilning 27-aprelida 8-sinf o‘quvchisi dastlab 1991-yilda tug‘ilgan А.X. tomonidan, keyinchalik uning ikki tanishi — M.M. va B.G. tomonidan jinsiy turdagi jinoyat sodir etilgani bo‘yicha 30-aprel kuni Jinoyat kodeksining 128-moddasi (o‘n olti yoshga to‘lmagan shaxs bilan jinsiy aloqa qilish) bo‘yicha jinoyat ishi qo‘zg‘atilib, gumonlanuvchilar qo‘lga olinib, ularning ishi sudga oshirilgandi.
11-noyabr kuni e’lon qilingan sud hukmiga ko‘ra, fuqaro A.X. Jinoyat kodeksining 128-moddasi (o‘n olti yoshga to‘lmagan shaxs bilan jinsiy aloqa qilish) 2-qismi “a” bandida nazarda tutilgan jinoyatni sodir etganlikda aybli deb topilib, 4 yil muddatga, B.G. va M.M. esa Jinoyat kodeksining 128-moddasi 1-qismida nazarda tutilgan jinoyatni sodir etganlikda aybli deb topilib, 2 yil muddatga ozodlikdan mahrum qilingandi.
“Nemolchi.uz”da aytilishicha, ulardan ikki nafari atigi yarim yil qamoqda o‘tirib chiqdi. Asosiy tashabbuskor, sobiq jismoniy tarbiya o‘qituvchisi esa qamalganidan 12 oy o‘tib ozodlikka chiqdi. Sudlanganlardan biri ayni damda tibbiyot markazida registrator bo‘lib ishlamoqda, markazda, xususan, bolalarga ham tibbiy xizmat ko‘rsatiladi.
Loyiha so‘roviga asosan Bosh prokuratura matbuot kotibi bergan ma’lumotga ko‘ra, maktabda o‘qituvchi bo‘lib ishlagan X.A.ga (1991-yilda tug‘ilgan) Jinoyat ishlari bo‘yicha Zangiota tuman sudining 2022-yil 7-maydagi ajrmiga ko‘ra, o‘talmay qolgan 2 yil 11 oy 27 kun ozodlikdan mahrum qilish jazosi Jinoyat kodeksining 74-moddasiga asosan shu muddatga oylik ish haqining 20 foizini davlat daromadi hisobiga ushlab qolgan xolda ahloq tuzatish ishlari jazosiga almashtirilgan.
Uning do‘sti, G.B. (1993-yilda tug‘ilgan) va M.M.ga esa (1994-yilda tug‘ilgan) esa Jinoyat ishlari bo‘yicha Ohangaron tuman sudining 12-maydagi ajrmiga ko‘ra, o‘talmay qolgan 1 yil 5 oy 29 kun ozodlikdan mahrum qilish jazosi Jinoyat kodeksining 74-moddasiga asosan shu muddatga oylik ish haqining 15 foizini davlat daromadi hisobiga ushlab qolgan xolda ahloq tuzatish ishlari jazosiga almashtirilgan.
Izoh (0)