Markaziy bank tomonidan o‘rta muddatli makroiqtisodiy rivojlanish prognozlari qayta ko‘rib chiqildi. Bu haqda pul kredit siyosati sharhida qayd etilgan.
Yangilangan prognozlarda quyidagi jihatlar inobatga olingan:
- 2022-yilning birinchi yarim yilligi bo‘yicha shakllangan statistik ma’lumotlar;
- tashqi iqtisodiy vaziyatlar bo‘yicha noaniqliklar;
- yalpi talabning shakllanishi;
- taklif bo‘yicha kutilayotgan tendensiyalar;
- ichki iqtisodiyotga ta’sirlar.
2022-yilning aprel oyida yalpi ichki mahsulotning (YIM) 2022-yil uchun prognozi 3,5-4,5 foiz etib belgilangan edi.
Markaziy bank birinchi yarim yillikda iqtisodiy faollikning kutilganidan yuqori darajada shakllanganligi sabab YIMning real o‘sishi 5-5,5 foiz atrofida bo‘lishini taxmin qilmoqda.
2022-yilning birinchi yarim yilligida makroiqtisodiy ko‘rsatkichlar kutilganidan yuqori darajada shakllandi. Xususan, iqtisodiyot tarmoqlarida yuqori o‘sish sur’atlari saqlanib qoldi, pul o‘tkazmalari hajmi keskin oshdi, eksport va import hajmlari yuqori sur’atlarda o‘sdi, — deydi Markaziy bank.
Bundan tashqari O‘zbekistonga kirib keladigan pul o‘tkazmalari hajmini joriy yilda 30-40 foiz atrofida o‘sishi kutilmoqda.
Markaziy bank tomonidan joriy yilning aprel oyida 2022-yilda inflyatsiya darajasi 12-14 atrofida bo‘lishi prognoz qilingan edi.
Bunda asosiy savdo hamkorlarda kuzatilayotgan yuqori inflyatsiya darajasi, jahon bozorida xomashyo va oziq-ovqat narxlarining keskin oshishi va import tovarlari bo‘yicha logistik muammolarning ta’sirlari inobatga olingandi.
Endi esa yil oxiriga kelib Markaziy bank tomonidan inflyatsiya darajasi 12-14 foizdan pastda bo‘lishi prognoz qilinmoqda.
Bunda yuzaga kelayotgan inflyatsion jarayonlar bilan bir qatorda mavjud noaniqliklar va xatarlar inobatga olingan.
Izoh (0)