Toshkent viloyati Angren shahrida aholiga ajratilgan un mahsulotini sotib yuborgan soxta tadbirkorlar aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Angren shahar bo‘limi tomonidan tergovga qadar tekshiruv o‘tkazilgan. Unda fuqarolar M.A. va T.B. soxta tadbirkorlik bilan shug‘ullanib, T. ismli shaxsning nomiga “Q.S.” va “K.A.” MCHJni tashkil etishib, ushbu MCHJlarga davlat resurslari hisobidan ajratilgan 369 million so‘mlik jami 148 tonna un mahsulotini belgilangan dislokatsiyaga asosan to‘g‘ridan-to‘g‘ri arzonlashtirilgan narxlarda sotilishini ta’minlamagani aniqlangan. Ular mahsulotni boshqa shaxslarga qimmat narxlarda sotib yuborgan.
Holat yuzasidan Jinoyat kodeksining 179-moddasi (soxta tadbirkorlik), 189-moddasi (savdo yoki xizmat ko‘rsatish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)