Buxoro viloyatida 2022-yilning o‘tgan davrida 2021-yilning shu davriga nisbatan bosqinchilik va avtomobil o‘g‘irlash jinoyati ko‘paygan. Bu haqda viloyat IIB boshlig‘i Shuhrat Aliyev ishtirokidagi matbuot anjumanida ma’lum qilindi, deya xabar berdi “Daryo” muxbiri.
Ma’lum bo‘lishicha, kecha viloyat IIB boshlig‘i ishtirokida OAV vakillari va blogerlar uchun matbuot anjumani tashkil etilgan.
“Buxoroda 2022-yilning olti oyi mobaynida 2165 ta jinoyat sodir etilgan. Bu raqam jinoyatlar soni o‘tgan yilgiga nisbatan 9,08 foiz kamayganini ko‘rsatayotgan bo‘lsa-da, jinoyatchilar soni 1791 nafarni ko‘rsatib, o‘tgan yilgiga nisbatan 381 kishiga ko‘payganini anglatmoqda. Jinoiy javobgarlikka tortilganlar esa 358 taga oshgan. Ayniqsa, ayollar o‘rtasida sodir etilgan jinoyatlarning 37 taga, yoshlar o‘rtasida 106, voyaga yetmaganlar o‘rtasida 6 taga, maktab, kollej o‘quvchilari orasida 4 taga ko‘paygani achinarli”, — deydi Shuhrat Aliyev.
Ta’kidlanishicha, bosqinchilik 3 tadan 6 taga, avtotransport vositalarini olib qochish 7 taga ko‘paygan. Og‘ir tan jarohati yetkazish va nomusga tegish jinoyatlari ham o‘tgan yilning mos davriga nisbatan barqaror saqlangan. Yuqorida qayd etilgan jinoyat va ma’muriy huquqbuzarliklardan jabr chekkan, tazyiq va zo‘ravonlikdan jabrlangan 2172 nafar xotin-qizga himoya orderi berilgan.
“Himoya orderi berish va profilaktik tadbirlar natijasida 2095 ta oila yarashtirildi, 804 ta oiladagi nizolar bartaraf etildi. Berilgan himoya orderi qoidalariga rioya qilmagan 87 nafar fuqaro ma’muriy javobgarlikka tortildi. Bundan tashqari, ijtimoiy himoyaga muhtoj ayollarning 2254 nafari ishga joylashtirildi. 1566 nafariga tibbiy yordam ko‘rsatilib, 2012 nafariga moddiy yordam berildi. 145 nafar zo‘rlik ishlatilishidan jabr ko‘rgan shaxslar reablitatsiya qilish markazlariga joylashtirildi”, — dedi Shuhrat Aliyev.
Izoh (0)