Sog‘liqni saqlash vazirligi tizimda joriy yilning o‘tgan 6 oyida xotin-qizlarning sog‘lig‘ini saqlash bo‘yicha amalga oshirilgan ishlar to‘g‘risida ma’lumot berdi.
Qayd etilishicha, 643 ming nafar xotin-qiz skrining tekshiruvlaridan o‘tkazilib, kasalliklar aniqlangan 3214 nafaridan 2983 nafari (93 foizi) sog‘lomlashtirilgan. Prenatal ultratovush tekshiruvidan o‘tkazilgan 333,5 ming nafar bo‘lajak onaning 7,9 ming nafarida homilasida nuqson va akusherlik patologiyasi aniqlanib, zarur choralar ko‘rilgan.
Toshkent shahrining barcha tug‘uruqxonalarida chaqaloqlarda eshitish nuqsonlarini erta aniqlashga qaratilgan audioskrining joriy etilgan. Shu yil 1-iyuldan boshlab bolalar, homilador va bola emizuvchi ayollarni maxsus profilaktik dori-darmonlar, 3-15 yoshdagi bolalarni yod preparati bilan bepul ta’minlashga kirishilgan.
Respublika “Ona va bola skriningi” markazi 38,4 million so‘mlik gematologik analizatorlar, Nukus, Buxoro, Samarqand, Farg‘ona “Ona va bola skriningi” markazlari esa 1,1 millird so‘mlik raqamli mikroskoplar hamda laboratoriya uskunalari bilan ta’minlangan.
Yil yakuniga qadar:
- 2,3 million nafar xotin-qiz birlamchi onkologik skrining tekshiruvidan, 18 yoshgacha bo‘lgan 11 million nafardan ziyod bolalar esa pediatr, stomatolog, endokrinolog va ortoped ko‘rigidan o‘tkaziladi;
- barcha tug‘ish yoshidagi ayollarning yagona elektron bazasi yaratiladi;
- 400 ming nafar homilador va bola emizuvchi ayollar hamda 4 million nafar 3-15 yoshdagi o‘g‘il-qizlar yod preparati bilan ta’minlanadi;
- 2 million nafar 15-35 yoshgacha tug‘ish yoshidagi ayollar temir va foliy kislotasi preparati bilan ta’minlanadi;
- spinal mushak atrofiyasi tashxisi qo‘yilgan 75 nafar bolaga zarur dori vositalari yetkazib beriladi.
Izoh (0)