Тошкент вилояти Ангрен шаҳрида аҳолига ажратилган ун маҳсулотини сотиб юборган сохта тадбиркорлар аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Ангрен шаҳар бўлими томонидан терговга қадар текширув ўтказилган. Унда фуқаролар М.А. ва Т.Б. сохта тадбиркорлик билан шуғулланиб, Т. исмли шахснинг номига «Қ.С.» ва «К.А.» МЧЖни ташкил этишиб, ушбу МЧЖларга давлат ресурслари ҳисобидан ажратилган 369 миллион сўмлик жами 148 тонна ун маҳсулотини белгиланган дислокацияга асосан тўғридан-тўғри арзонлаштирилган нархларда сотилишини таъминламагани аниқланган. Улар маҳсулотни бошқа шахсларга қиммат нархларда сотиб юборган.
Ҳолат юзасидан Жиноят кодексининг 179-моддаси (сохта тадбиркорлик), 189-моддаси (савдо ёки хизмат кўрсатиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)