Xitoy Tayvan hududida harbiy mashg‘ulotlar o‘tkazayotganini e’lon qildi
Xitoy armiyasi Tayvan hududida jangovar tayyorgarlik patrullari va mashg‘ulotlarini tashkil etdi. Bu haqda armiya bayonotiga tayanib, Sinxua agentligi xabar berdi.
“Yaqinda Xitoy Xalq ozodlik armiyasining Sharqiy teatr qo‘mondonligi Tayvan oroli atrofidagi dengiz va havo hududida ko‘p maqsadli qo‘shma jangovar tayyorgarlik patrullari hamda jangovar mashqlarni tashkil etdi” — deyiladi bayonotda.
Qayd etilishicha, mashg‘ulotlar havo va dengiz hududida o‘tkazilmoqda.
Shuningdek, bayonotda AQSHning “Tayvan muammosi bo‘yicha bo‘lginchi kuchlarni qo‘llab-quvvatlash uchun” tashlagan qadamlari foydasiz ekani va bu mintaqadagi keskinlikni yanada kuchaytirayotgani qayd etilgan.
“Tayvan Xitoyning bir qismidir va mamlakat armiyasi Tayvan mustaqilligini o‘rnatishga qaratilgan har qanday urinishlarni qat’iy bostiradi”, — deyiladi xabarda.
Tayvan atrofidagi vaziyat shu yilning bahorida keskinlashdi. Aprel oyida Xitoy AQSH tomonidan “Tayvan bo‘lginchilari”ga “jiddiy noto‘g‘ri signal bergani” sababli Tayvan atrofida keng ko‘lamli mashg‘ulotlar o‘tkazilishini e’lon qildi. Bunga olti nafar amerikalik kongressmenning orolga tashrifi sabab bo‘lgan.
Tayvan — Janubiy Xitoy dengizidagi orol, Xitoy qirg‘oqlaridan 150 kilometr uzoqlikda joylashgan. 1949-yilda Xitoy inqilobi paytida mamlakat hukumati orolga qochib ketgan, hudud Xitoydan ajralib chiqqanini e’lon qilgan, ammo Pekin uni Xitoy provinsiyalaridan biri deb hisoblaydi.
AQSH Tayvan bilan rasmiy diplomatik aloqalarga ega emas, lekin orol bilan aloqalarni davom ettirmoqda va unga qurol sotmoqda. Rasman Vashington “Yagona Xitoy” tamoyilini qo‘llab-quvvatlaydi.
Keyinchalik, iyun oyi o‘rtalarida Xitoy Mudofaa vazirligi matbuot kotibi U Syan, agar zarurat tug‘ilsa, Xitoy Tayvan uchun kurashishga tayyorligini aytdi. Xitoy harbiylari Tayvanning ajralib chiqishiga yo‘l qo‘ymaslik va mamlakat hududiy yaxlitligini himoya qilish uchun barcha imkoniyatlarni ishga soladi, dedi u.
