Yevropaning yetakchi neft kompaniyalari — ExxonMobil, Chevron va Shell’ning umumiy foydasi ikkinchi chorakda 46 milliard dollarni tashkil etdi, deb yozadi The Wall Street Journal.
AQSHning eng yirik neft kompaniyasi ExxonMobil 29-iyul, juma kuni 2022-yilning ikkinchi choragidagi foydasi 17,9 milliard dollarni tashkil etganini e’lon qildi. Bu o‘tgan yilning shu davriga nisbatan deyarli to‘rt baravar ko‘pdir.
Yana bir neft giganti Chevron ham aprel—iyun oylarida olingan foydaning oshgani haqida xabar berdi. O‘tgan yilning ikkinchi choragida kompaniya 3,1 milliard dollar foyda olgan bo‘lsa, joriy yilda bu ko‘rsatkich 11,6 milliard dollarni tashkil etgan.
O‘z navbatida, Shell 28-iyul, payshanba kuni aprel—iyun oylarida 16,7 milliard dollar miqdorida foyda olgani haqida xabar berdi.
The Wall Street Journal nashrining yozishicha, G‘arb neft gigantlari daromadlarining oshishiga asosiy sabab ko‘plab mamlakatlar tomonidan koronavirus pandemiyasi bilan bog‘liq karantin choralari bekor qilinganidan keyin neft va gazga bo‘lgan talabning keskin oshishidir.
Bundan tashqari, Rossiya energiya tashuvchilariga qarshi sanksiyalar neft narxining yanada oshishiga olib keldi.
Neft kompaniyalari daromadining o‘sishi 2020-yilda COVID-19 pandemiyasi boshlanishi sababli o‘nlab kompaniyalarning qulashi va bankrot bo‘lishiga olib kelgan sanoatdagi sezilarli burilishni anglatadi.
Izoh (0)