Markaziy bank ipoteka kreditlari sharhini taqdim qildi. Unga ko‘ra 2022-yilning birinchi yarmida 36,4 ming nafar fuqaroga ipoteka kreditlari ajratilgan.
Ajratilgan ipoteka kreditlari o‘tgan yilning mos davriga nisbatan 85 foizga yoki 3 trln so‘mga oshib, 6,5 trln so‘mni tashkil qildi.
2022-yil 1-iyul holatiga ko‘ra ipoteka kreditlari qoldig‘i 40,5 trln so‘mni tashkil etib, 2021-yilning mos davriga nisbatan qariyb 32 foizga yoki 9,7 trln so‘mga o‘sgan.
Moliya vazirligi mablag‘lari hisobidan 30 mingdan ko‘p fuqaroga 5,1 trln so‘m hamda bank o‘z mablag‘lari hisobidan 6,2 ming nafar fuqaroga 1,4 trln so‘m miqdorida ipoteka kreditlari ajratilgan.
Mazkur davrda ajratilgan jami ipoteka kreditlarining 5,3 trln so‘mi yoki 81 foizi birlamchi bozordagi uylarga, 1,2 trln so‘mi yoki 19 foizi ikkilamchi bozordagi uylar uchun yo‘naltirilgan.
Ushbu kreditlarning 41 foizi yoki qariyb 15 ming nafari ayollar hisobiga to‘g‘ri keladi.
Banklar o‘z mablag‘i hisobidan ajratgan ipoteka kreditlarining jami ko‘rsatkichdagi ulushi 2022-yil birinchi yarmida 21 foizni tashkil etib, o‘tgan yilning mos davriga nisbatan 178 foizga yoki 2,8 barobarga oshgan.
O‘tgan yilning birinchi yarmiga nisbatan aholini uy-joy bilan ta’minlashning bozor tamoyillariga asoslangan “Yangi tartib” doirasida ajratilgan ipoteka kreditlarining ulushi 48 foizdan (1,7 trln so‘mdan) 56 foizga (3,6 trln so‘mga) oshdi.
Mavzuga doir:
Izoh (0)