Бухоро вилоят ИИБ бошлиғи туман Ички ишлар бўлими раҳбарларидан ҳафтасига 2 минг доллардан улуш олишини рад этди. Бу ҳақда вилоят ИИБ бошлиғи Шуҳрат Алиев иштирокидаги матбуот анжуманида маълум қилинди, дея хабар берди «Дарё» мухбири.
Маълум бўлишича, бугун Бухоро вилоят ИИБда журналист ва блогерлар учун матбуот анжумани ташкил этилиб, Ички ишлар бошқармаси ва унинг қуйи тизимларида амалга оширилаётган ислоҳотлар ҳақида маълумот берилган.
Таъкидланишича, 2022 йилнинг олти ойи давомида вилоят ИИБга жами 8241 та мурожаат келиб тушган.
«Фуқароларнинг турли мазмундаги бу мурожаатлари ўтган йилнинг шу даврига нисбатан 1516 тага, яъни 22,5 фоизга ошди. Шунингдек, тизимда фаолият юритиб келган ходимларнинг ноўрин хатти-ҳаракатлари устидан берилган шикоятлар сони 25 фоизга, 17 тага камайган. Хизмат интизоми ва қонунчиликни бузган 82 нафар ходимга нисбатан турли кўринишдаги интизомий таъсир чоралари қўлланилди. Салбий ҳолатларга кўра, 32 нафар ходим ички ишлар органлари сафидан бўшатилди. Хизмат интизомини бузиш ҳолатлари ошган соҳавий хизматлар ҳақида тўхталадиган бўлсак, ҳуқуқбузарлик профилактика бошқармасида 13 тага, ташкилий бошқарма 3 тага, хавфсиз туризм бошқармасида 2 тага ошган. Маъмурий ҳуқуқбузарликлар ҳолатлари бўйича жами 48 нафар ходим маъмурий жавобгарликка тортилди», — деди Шуҳрат Алиев.
Билдирилишича, шу давр мобайнида ИИБ ходимлари томонидан 1 та жиноят содир этилган.
Матбуот анжуманида қатнашган блогер Дилфуза Ибодова вилоят ИИБ бошлиғига юзланиб, ижтимоий тармоқларда бошқарма бошлиғи қўли остидагилардан ҳафтасига улуш олаётгани ёзилганини айтиб, бунинг қанчалик ҳақиқатга яқинлигини сўраган. Бошқарма бошлиғи эса буни рад этган.
«Норасмий сайтларга берилаётган хабарларга маълумот берилмайди. Бошқарма бошлиғининг фаолиятини ҳам назорат қиладиган ва баҳо берадиган раҳбарлар бор. Бизнинг фаолиятимиз билан боғлиқ бўлган вазиятлар ҳам ички ишлар вазирлиги топшириғига асосан ўрганилади, текширув ўтказилади. Ижтимоий тармоқларда ахборот тарқатувчилар томонидан аниқ маълумот келтирилмаган. Шу боис, бунга шарҳ беришни зарурат, деб билмайман. Агар ҳақиқатан ҳам фактлари бўлса, прокуратура ёки бошқа органларга маълумотларни тақдим этиши мумкин. Важ мутлақо нотўғри ва уни рад этаман», — деди Шуҳрат Алиев.
Изоҳ (0)