O‘zbekistonda 2022-yilning o‘tgan olti oyi mobaynida olti ming nafarga yaqin mansabdor mehnat qonunchiligini buzgani uchun 12 milliard so‘m jarima to‘lagani ma’lum bo‘ldi. Bu haqda Bandlik va mehnat munosabatlari vazirligi axborot xizmati rahbari Mavjuda Mirzayeva ishtirokidagi matbuot brifingida ma’lum qilindi.
Brifingda ma’lumot berilishicha, 2022-yilning o‘tgan olti oyi davomida 14 mingta korxonada nazorat tadbirlari o‘tkazilgan. Tadbir davomida 41 ming 150 ta qonun buzilish holatlari aniqlangan.
“Qonunbuzilish holatlarini bartaraf etish bo‘yicha ish beruvchilarga 5 ming 688 ta yozma ko‘rsatma va 1 ming 866 ta taqdimnoma kiritilgan. 5 ming 935 nafar mansabdor shaxsga nisbatan 12 milliard so‘mdan ortiq miqdorda ma’muriy jarimalar qo‘llanilgan. 3 ming 146 ta holatda ish haqini belgilangan muddatlarda to‘lab bermaslik, 3 ming 123 ta holatda ta’tillar berish tartibiga rioya etmaslik, 1 ming 627 ta holatda aholini ish bilan ta’minlash to‘g‘risidagi qonun hujjatlarini buzish, 1 ming 116 ta mehnat daftarchalarini yuritish tartibini buzish, 782 ta holatda mehnat shartnomasi tuzmasdan, norasmiy ravishda xodimlar mehnatidan foydalanish, 756 ta noqonuniy ishdan bo‘shatish holatlari aniqlangan”, — deydi Mavjuda Mirzayeva.
Qo‘shimcha qilinishicha, 13 ming 868 ta holatda mehnatni muhofaza qilish va texnika xavfsizligi qoidalariga amal qilmaslik aniqlangan. Jumladan, 1 ming 835 ta holatda xodimlar mehnatni muhofaza qilish va texnika xavfsizligi yo‘l yo‘riqlaridan o‘tkazilmasdan ishlashiga ruxsat berilgan, 1 ming 605 ta holatda korxonada mehnatni muhofaza qilish bo‘yicha xodimlarni o‘qitish va bilimlarini tekshirish tashkil etilmagan, 878 ta holatda mehnatni muhofaza qilish bo‘yicha chora-tadbirlar va rejalar ishlab chiqilmagan, 796 ta holatda xodimlar maxsus kiyimlar bilan ta’minlanmagan.
“Shuningdek, 719 ta korxonada xodimlar tibbiy ko‘rikdan o‘tkazilmagan, 639 ta tashkilotlarda mehnatni muhofaza qilish xizmati tashkil etilmagan, mehnat sharoitlari attestatsiyadan o‘tkazilishi majburiy bo‘lgan 501 ta korxonalar ushbu attestatsiyani o‘tkazmagan. Joriy yilning olti oyi davomida ishlab chiqarishda yuz bergan 357 baxtsiz hodisalar belgilangan tartibda maxsus tekshirildi, shulardan 76 tasi o‘lim bilan tugagan, 257 tasi ta oqibati og‘ir va 24 tasi guruhiy baxtsiz hodisalarni tashkil etdi”, — deydi vazirlik mas’uli.
Yuz bergan baxtsiz hodisalar natijasida 105 nafar xodim halok bo‘lgan, 277 nafar xodim og‘ir tan jarohati va 9 nafari yengil tan jarohati olgan.
Izoh (0)