Ўзбекистонда 2022 йилнинг ўтган олти ойи мобайнида олти минг нафарга яқин мансабдор меҳнат қонунчилигини бузгани учун 12 миллиард сўм жарима тўлагани маълум бўлди. Бу ҳақда Бандлик ва меҳнат муносабатлари вазирлиги ахборот хизмати раҳбари Мавжуда Мирзаева иштирокидаги матбуот брифингида маълум қилинди.
Брифингда маълумот берилишича, 2022 йилнинг ўтган олти ойи давомида 14 мингта корхонада назорат тадбирлари ўтказилган. Тадбир давомида 41 минг 150 та қонун бузилиш ҳолатлари аниқланган.
«Қонунбузилиш ҳолатларини бартараф этиш бўйича иш берувчиларга 5 минг 688 та ёзма кўрсатма ва 1 минг 866 та тақдимнома киритилган. 5 минг 935 нафар мансабдор шахсга нисбатан 12 миллиард сўмдан ортиқ миқдорда маъмурий жарималар қўлланилган. 3 минг 146 та ҳолатда иш ҳақини белгиланган муддатларда тўлаб бермаслик, 3 минг 123 та ҳолатда таътиллар бериш тартибига риоя этмаслик, 1 минг 627 та ҳолатда аҳолини иш билан таъминлаш тўғрисидаги қонун ҳужжатларини бузиш, 1 минг 116 та меҳнат дафтарчаларини юритиш тартибини бузиш, 782 та ҳолатда меҳнат шартномаси тузмасдан, норасмий равишда ходимлар меҳнатидан фойдаланиш, 756 та ноқонуний ишдан бўшатиш ҳолатлари аниқланган», — дейди Мавжуда Мирзаева.
Қўшимча қилинишича, 13 минг 868 та ҳолатда меҳнатни муҳофаза қилиш ва техника хавфсизлиги қоидаларига амал қилмаслик аниқланган. Жумладан, 1 минг 835 та ҳолатда ходимлар меҳнатни муҳофаза қилиш ва техника хавфсизлиги йўл йўриқларидан ўтказилмасдан ишлашига рухсат берилган, 1 минг 605 та ҳолатда корхонада меҳнатни муҳофаза қилиш бўйича ходимларни ўқитиш ва билимларини текшириш ташкил этилмаган, 878 та ҳолатда меҳнатни муҳофаза қилиш бўйича чора-тадбирлар ва режалар ишлаб чиқилмаган, 796 та ҳолатда ходимлар махсус кийимлар билан таъминланмаган.
«Шунингдек, 719 та корхонада ходимлар тиббий кўрикдан ўтказилмаган, 639 та ташкилотларда меҳнатни муҳофаза қилиш хизмати ташкил этилмаган, меҳнат шароитлари аттестациядан ўтказилиши мажбурий бўлган 501 та корхоналар ушбу аттестацияни ўтказмаган. Жорий йилнинг олти ойи давомида ишлаб чиқаришда юз берган 357 бахтсиз ҳодисалар белгиланган тартибда махсус текширилди, шулардан 76 таси ўлим билан тугаган, 257 таси та оқибати оғир ва 24 таси гуруҳий бахтсиз ҳодисаларни ташкил этди», — дейди вазирлик масъули.
Юз берган бахтсиз ҳодисалар натижасида 105 нафар ходим ҳалок бўлган, 277 нафар ходим оғир тан жароҳати ва 9 нафари енгил тан жароҳати олган.
Изоҳ (0)