Yaponiya 1-avgustdan boshlab Rossiyadan oltin import qilishni taqiqlaydi

Yaponiya hukumatining mamlakatga Rossiyadan oltin olib kirishni taqiqlash to‘g‘risida avvalroq qabul qilgan qarori 1-avgustdan kuchga kiradi. Bu haqda Yaponiya Moliya vazirligi matbuot xizmatiga tayanib, “Interfaks” xabar berdi.

“Bu borada vazirlikning yangilangan bildirish xati joriy yilning 1-avgustidan kuchga kiradi”, — deyiladi press-relizda.

Hujjatga ko‘ra, oltin importini taqiqlash Yaponiya Vazirlar Mahkamasi tomonidan 5-iyulda qabul qilingan qaror asosida, Rossiyaga aloqador shaxslarning aktivlarini muzlatish chora-tadbirlari doirasida joriy etilgan.

Avvalroq Yevropa Ittifoqi va Buyuk Britaniya ham Rossiya oltiniga embargo joriy qilgan edi. Embargo zargarlik buyumlariga ham tegishli.

G7 guruhiga kiruvchi qator davlatlarning Rossiyadan oltin importiga embargo joriy etish rejalari iyun oxirida ma’lum bo‘lgandi.