Boris Jonson Buyuk Britaniya bosh vaziri lavozimini tark etishdan oldin Kiyevga so‘nggi marta safar qilishni rejalashtirmoqda. Bu haqda manbalarga tayanib, Daily Telegraph xabar berdi.
Nashr ma’lumotlariga ko‘ra, Jonson Ukraina prezidenti Vladimir Zelenskiy bilan uchrashish va o‘z qo‘llab-quvvatlovini ommaviy tarzda e’lon qilish uchun Kiyevga uchinchi bor tashrif buyurmoqchi.
“Jonson Zelenskiyning eng asosiy tarafdori bo‘lgani uchun mas’uliyat yukini chinakamiga his qiladi. U shunchaki keta olmaydi va dunyo uning o‘rnini bilintirmasligiga ishonchi komil emas”, — dedi ismini oshkor etmagan manba.
Jonson 7-iyul kuni iste’foga chiqishini e’lon qilgandi. Jinsiy zo‘ravonlikda ayblangan deputat Kris Pincher hukumat lavozimiga tayinlanganidan keyin Boris Jonson o‘z lavozimini tark etishga majbur bo‘ldi, chunki Jonson Pincherga nisbatan qo‘yilgan ayblovlardan xabardor bo‘la turib, uning lavozimga tayinlanishiga imzo chekkan.
Buyuk Britaniyaning sobiq moliya vaziri Rishi Sunak va tashqi ishlar vaziri Liz Trass yangi bosh vazir lavozimiga da’vogarlik qilmoqda.
Bundan tashqari, Britaniya bosh vaziri bir necha bor ittifoqchilarni Ukrainani qo‘llab-quvvatlashni kuchaytirishga va bu mavzudan “charchamaslikka” chaqirgan.
“Hozir Ukrainadan voz kechish vaqti emas. Buyuk Britaniya Ukrainani har qadamda qo‘llab-quvvatlashda davom etadi, chunki bilamiz — ularning xavfsizligi bizning xavfsizligimiz, ularning erkinligi bizning erkinligimiz”, — degan Jonson iyun oxirida.
Izoh (0)