AQSHning Kaliforniya shtatida o‘rmon yong‘inlari sabab minglab aholi uylarini tark etishga majbur bo‘ldi.
Kaliforniyadagi o‘rmon yong‘ini AQSH bo‘ylab yilning eng yirik yong‘inlaridan biriga aylandi. Hozirda olov ulkan qadimiy sekvoyalari bilan mashhur Yosemit milliy bog‘i tomon siljimoqda.
Tez tarqalayotgan o‘rmon yong‘inlarini bartaraf etish uchun 2000 ga yaqin o‘t o‘chiruvchilar, havo sisternalari, buldozerlar va boshqa brigadalar jalb qilindi, biroq mahalliy o‘t o‘chirish rasmiylarining aytishicha, yong‘in barcha sa’y-harakatlarni ortda qoldirgan.
“Yong‘in bizni tezda chetlab o‘tdi. Qo‘limizdagi resurslar bilan ham unga hujum qila olmadik. Butun faoliyatim davomida yong‘inning bunday tus olishini ko‘rmaganman”, — dedi Kaliforniya yong‘in xavfsizligi boshlig‘i Jastin Makomb.
Kaliforniya o‘rmon xo‘jaligi va yong‘indan himoya qilish departamenti (Kal Fire) ma’lumotlariga ko‘ra, 24-iyul holatiga yong‘in 6314 gektar maydonni egallagan va uni o‘chirish foizi nolga teng bo‘lgan. O‘nta bino vayron bo‘lgan va yana beshtasi zarar ko‘rgan.
Izoh (0)